Islam ınstıtýtynyń jumys esebin tyńdady (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly jumys sapary aıasynda Almatydaǵy Respýblıkalyq ımamdardyń bilimin jetildirý Islam ınstıtýtynda bolyp, oqý ordasynyń jumys esebin tyńdady.

Bas múftıge atqarylǵan jumystardyń esebin baıandaǵan ınstıtýt dırektory Kenjeáli qajy Qońyratbaıuly 2001-2019 jyldar arasynda ár óńirden kelgen 1925 din qyzmetkeri arnaıy tálimdik kýrstan ótkenin jetkizdi. Sonymen qatar, Islam ınstıtýtynyń alda atqarar jumystarynyń josparymen tanystyrdy.

Din qyzmetkeriniń bilimi men biliktiligin arttyrýdyń mańyzdylyǵyna aıryqsha toqtalǵan Naýryzbaı qajy Taǵanuly: «Imam-moldalardyń bilimi men tájirıbesin shyńdaý kún tártibindegi basty jumysymyz bolyp qala beredi. Bul baǵyttaǵy is-sharalarymyzdy toqtatpaımyz. Sondyqtan, Islam ınstıtýtynyń oqý baǵdarlamasyn únemi jetildirip otyrýmyz kerek. Imamdarymyz tek dinı bilimmen shektelip qalmasyn. Olardy ǵylymı jańalyqtardan habardar etip, tarıh pen aqparattyq tehnologııa, psıhologııa men ádebıet salalary boıynsha bilimin arttyrýǵa kóńil aýdarýymyz kerek», – dep atap ótti.

Instıtýttyń ıgi bastamalaryna oń baǵa bergen Bas múftı oqý ordasynyń dırektoryna alǵysy men iltıpatyn jetkizip, duǵa jasady.

Aıta ketsek, Islam ınstıtýtynda tálim alyp jatqan ımamdar arasynda Reseıdiń Omby oblysy men Mońǵolııanyń Baıan-Ólgeı aımaǵynan kelgen qandastarymyz da bar. Jýyrda 55 din qyzmetkeri Bas múftı qolynan arnaıy kýrsty bitirgenin dáleldeıtin kýálik aldy.