«Inabat» klýby bir jyldyǵyn atap ótti (FOTO+VIDEO)

Búgin respýblıkalyq «Áziret Sultan» meshitiniń áıel jamaǵaty arasynda qurylǵan «Inabat» qyz-kelinshekter klýby óziniń bir jyldyq mereıtoıyn atap ótti. Osydan bir jyl buryn QMDB tóraǵasynyń birinshi orynbasary, naıb múftı Naýryzbaı qajy Taǵanulynyń bastamasymen Bas meshittiń áıel jamaǵaty arasynda qurylǵan «Inabat» klýbynyń búginde aýqymy keńeıip, top músheleriniń qatary kún sanap kóbeıip kele jatqan jaıy bar.

Ataýly dataǵa oraı aq dastarhan jaıylyp, talaı taǵylymdy keshterdiń uıytqysy bolǵan «Inabat» klýby óz mereıtoılaryn erekshe atap ótti. Aq jaýlyqty ájeler tórdiń sánin kirgizip, talshybyqtaı buralǵan qyz-kelinshekter merekelik sharanyń kórigin qyzdyra tústi. Ásem án aıtylyp, qazaqy qara dombyra kúmbirlegen rýhanı kesh úlkenderdiń batasymen nurlanyp, taǵylymy tereńdeı tústi. Sondaı-aq, jamaǵattyń bilimin arttyra túsý maqsatynda arnaıy «Suraq-jaýap» oıyny oınatylyp, jeńimpazdarǵa syılyqtar úlestirildi.

Aıtýly basqosýǵa Nur-Cultan qalasynyń bas ımamy Naýryzbaı qajy Taǵanuly arnaıy qatysyp, quttyqtaý lebizin jetkizdi. Bir ǵana jyldyń ishinde «Inabat» klýby atqarǵan sharalardyń kóptigin tilge tıek etken naıb múftı «Áziret Sultan» meshitiniń áıel ustazdaryna aıryqsha alǵysyn bildirdi.

Kesh aıasynda «Inabat» klýbynyń bir jyl ishinde atqarǵan is-sharalar esebi kórsetilip, qatysýshylarǵa jalpy kýlbtyń ustanǵan baǵyty men jumys jospary tanystyryldy. Sondaı-aq, kesh sońynda «Áziret Sultan» meshitiniń ustazy Nurǵalıeva Dınara «Inabat» klýbynyń erekshe belsendilik tanytqan múshelerine jáne Nur-Sultan qalasyndaǵy birneshe eriktiler tobyna arnaıy «Alǵys hat» tabystady.

Sýretterdi «FOTOGALEREIa» aıdarynan kóre alasyzdar!