IMAMDARYMYZ QOǴAM TALABYNA SAI BOLÝY QAJET – BAS IMAM

Astana qalasynyń bas ımamy Nurbek qajy Áýeshanuly elordadaǵy «Aqmeshit» meshitine arnaıy baryp, din qyzmetkerlerimen kezdesti.

Kezdesý barysynda bas ımam din qyzmetkerleriniń jaýapkershiligine toqtalyp, árbir ımam men ustaz ózine júktelgen amanatty adal atqarýy qajettigin atap ótti. Sondaı-aq meshitterdegi dinı-aǵartýshylyq jumystardy jandandyryp, jamaǵatpen baılanysty nyǵaıtýdyń mańyzyn jetkizdi.

«Jamaǵatpen jumys – basty mindet. Meshitke kelgen ár adam ózin qadirli qonaq sezinýi kerek. Ásirese jastardy meshitten alystatpaı, olarǵa túsinikti tilde nasıhat aıtý qajet. Biz tek namaz ótkizip qana qoımaımyz, halyqtyń dinı senimine jaýaptymyz. Qoǵamnyń talaby kúshti. Biz soǵan laıyqty túrde jaýap bere alýymyz kerek. Jamaǵat bizden dinı bilim, ónege jáne sabyr kútedi. Meshit qoǵamdy biriktiretin rýhanı ortalyq bolýy tıis. Árdaıym din men dástúrdiń úndestigin kórsetý mańyzdy. Qoryta aıtarym bizge úlken amanat júktelgen. Sol amanatqa adal bolýǵa shaqyramyn!», – dedi Nurbek qajy Áýeshanuly.

Bas ımam óz sózinde meshitke kelgen árbir adam ózin qadirli qonaq retinde sezinýi tıis ekenin aıtyp, jastarmen jumysty kúsheıtý, olarǵa túsinikti ári zamanaýı tásilmen nasıhat júrgizý qajettigin jetkizdi. Sonymen qatar áleýmettik jelilerde belsendilik tanytyp, dástúrli ıslam qundylyqtaryn keńinen nasıhattaýdyń mańyzdylyǵyna toqtaldy.

Kezdesý barysynda jat aǵymdardyń aldyn alý máselesi de kóterildi. Bas ımam adasqan azamattarǵa durys baǵyt-baǵdar berip, olardy dástúrli ıslam jolyna shaqyrý – din qyzmetkerleriniń mańyzdy mindetteriniń biri ekenin atap ótti.

Jıynda úzdiksiz bilim alýdyń mańyzy sóz bolyp, jastardyń dinı bilimge degen qyzyǵýshylyǵyn tıimdi paıdalaný qajettigi aıtyldy. Osy rette dáris sanyn arttyrý, shákirtterdi kóbeıtý, meshit qujattaryn zań talaptaryna saı júrgizý jáne qyzmet sapasyn kóterý máseleleri talqylandy.

Kezdesý sońynda Nurbek qajy Áýeshanuly meshit qyzmetkerlerine sáttilik tilep, «Aqmeshit» meshitiniń bas ımamy Dáýren Mýslımov bastaǵan ujymǵa atqarylyp jatqan ıgi jumystar úshin rızashylyǵyn bildirdi. Sondaı-aq bas ımam jamaǵatpen birge juma namazyn oqyp, jurtshylyqqa ýaǵyz-nasıhat aıtty.

Источник: Aisha