Imamdar forýmyna daıyndyq barysy talqylandy (FOTO+VIDEO)
Búgin Elordadaǵy QMDB bas keńsesinde osy aıda ótetin III Respýblıkalyq ımamdar forýmyna daıyndyq barysy talqylandy.
Alqaly jıynǵa Aqparat jáne qoǵamdyq damý vıtse-mınıstri Marat Ázilhanov, birinshi naıb múftı, Nur-Sultan qalasynyń Bas ımamy Naýryzbaı qajy Taǵanuly, naıb múftı Esmahan Baýyrjan Ábdirashuly, Apparat basshysy Ǵylymbek Májıev jáne bólim basshylary qatysty. Óz kezeginde Marat Almasuly Dinı basqarmaǵa Mınıstrlik tarapynan qashan da qoldaý bar ekenin aıta kele, forýmda qabyldanatyn qujattyń tarıhı mańyzy zor dedi.
«Bul qujat jastardy jat aǵymnan saqtandyryp, ımamdardyń mártebesin aıqyndap bermek. Iaǵnı musylmannyń eki qanaty bar desek, dinı ustanym men ulttyq qundylyqtar osy jerde túgel qamtylady. Eldiń bolashaǵyna baıyppen qaraıtyn kez-kelgen adamǵa oı salýy tıis. Onyń qaıyrymdy, úlgili, jaýapkershiligi men adamgershiligi mol bolýyna áser etýimiz kerek»,- dedi vıtse mınıstr.
Sonymen qatar aldaǵy ýaqytta Islam dinin nasıhattaǵan keshegi jyraýlar, aqyndar, abyzdar men bılerdiń ómirinen toptama daıyndaý qolǵa alynbaq.
Jıyn sońynda Mınıstrlik pen Dinı basqarma qaıyrymdylyq, zeket boıynsha birqatar jumystardy birigip atqarýǵa ýaǵdalasty.
