III Respýblıkalyq ımamdar forýmy bastaldy (FOTO)
Elordada Qazaqstan musylmandary dinı basqarmasynyń uıymdastyrýymen «Rýhanı qundylyqtar – qoǵam birliginiń negizi» atty III Respýblıkalyq ımamdar forýmy bastaldy.
Forýmǵa QR Prezıdent ákimshiliginiń basshysy Erlan Qoshanov, Premer-mınıstr orynbasary Berdibek Saparbaev, Aqparat jáne qoǵamdyq damý mınıstri Dáýren Abaev, Nur-Sultan qalasynyń ákimi Altaı Kólginov, Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz, QMDB tóraǵasynyń birinshi orynbasary, Nur-Sultan qalasynyń bas ımamy Naýryzbaı qajy Taǵanuly, memleket jáne qoǵam qaıratkeri Myrzataı Joldasbekov, t.b. ǵalymdar men belgili teologtar, elimizdiń ár aımaǵynan kelgen 500 ımam qatysty.
Forýmdy ashqan Qazaqstan musylmandary dinı basqarmasynyń tóraǵasy, Bas múftı Serikbaı qajy Satybaldyuly: «Bizdiń basty qundylyǵymyz – eldiń amandyǵy men jerdiń tynyshtyǵy, birligi men beıbitshiligi. «Otandy súıý – ımannan» degen ataly sóz bar. Bul – tilge jeńil bolǵanymen, júrekke jyly tıetin naqyl. Otbasyn izgilikke tárbıeleý, eldiń ıgiligine qyzmet etý, turaqtylyq pen tynshytyqqa tilektes bolý, mine, Otandy súıý degen osydan bastalady. Otanshyl adam óz ortasyn bereke men birlikke bólep, izgilikke úndep júredi.
Rasynda, halyqqa qyzmet etýden asqan ǵazız dúnıe joq. Áıgili Áıteke bıdiń «Ómirim – halyqtiki, ólimim – ózimdiki» deýi de sondyqtan. Ardaqty Paıǵambarymyz (oǵan Allanyń salaýaty men sálemi bolsyn): «Aralaryńda eń jaqsylaryń – aınalasyna paıdaly bolǵandaryń», –dep, qoǵamǵa shýaǵyn shashyp, jaqsylyǵyn jaıyp júretin kópshil kisiniń mártebesin erekshe atap ótken», – dedi.
Forýmda «Jeti rýhanı qazyq» Qazaqstan musylmandary dinı basqarmasynyń Rýhanı tuǵyrnamasy, QMDB atqaratyn dinı rásimder tizilimi, QMDB qurylymyndaǵy dinı laýazymdar tizilimi syndy qujattar qabyldanady. Basqosý sońynda forýmnyń Úndeýi jarııalanbaq.
