I Respýblıkalyq medresearalyq Quran Kárim jarysy ótti (FOTO+VIDEO)
Elordamyzdaǵy qulshylyq ordasy «Aqmeshitte» I Respýblıkalyq medresearalyq Quran Kárim jarysy ótti. «Astana» medresesiniń uıymdastyrýymen ótken aıtýly saıysqa elimizdiń 9 medresesinen 18 úmitker qatysty. Saıys shartyna sáıkes shákirtter «29-30-para» jáne «30-para» atalymy boıynsha synǵa tústi. II kýrsta tálim alatyn shákirtter tek 30-para boıynsha suralsa, al, III kýrs shákirtteri eki para boıynsha da bilimderin kórsetti.
QMDB tóraǵasynyń birinshi orynbasary, naıb múftı Naýryzbaı qajy Taǵanuly Quran saıysynyń ashylý saltanatyna arnaıy qatysyp, izgi tilegin bildirdi. Naıb múftı jıylǵan jamaǵat pen qatysýshy shákirtterge qasıetti Quran Kárimniń mańyzdylyǵy men musylman ómirinde alar orny jaıynda tushymdy nasıhat aıtyp, bilim jolyndaǵy shákirtterge sáttilik tiledi.
Shákirtterdiń bilim deńgeıin baǵalap, saıysqa qazylyq jasaý jaýapkershiligi QMDB Dinı bilim jəne kadr daıarlaý bóliminiń meńgerýshisi Beıbit Myrzageldıev, respýblıkalyq qarılar ortalyǵynyń dırektory Sádýaqas qarı Saǵyndyquly, «Áziret Sultan» meshitiniń naıb ımamy Jumanazar qarı Óserhanuly jáne «Astana» medresesiniń dırektory Ibrahım Smataevtarǵa júkteldi. Saıys erejesine sáıkes, árbir úmitker qazylar alqasy tarapynan qoıylǵan úsh saýalǵa jaýap berip otyrdy. Jarys jeńimpazyn anyqtaý barysynda shákirtterdiń Quran aıattaryn jattaý qabileti, oqý máneri jáne áýezdiligi eskerildi.
Saıys sońynda qatysýshylar men jeńimpazdar baǵaly syılyqtarǵa ıe boldy. Jeńimpaz bolǵan shákirtter tizimi tómendegideı:
«29-30-para» atalymy boıynsha:
Bas júlde - «Ábý Hanıfa medrese kolledji», Álıákbar Jádiger;
1-shi oryn - «Astana medrese kolledji», Nábı Nurdáýlet;
2-shi oryn - «Saryaǵash medrese kolledji», Makan Aıdyn;
3-shi oryn - «Hıbatýlla Át-Tarazı medrese kolledji», Qońyratbaev Berikqan.
«30-para» atalymy boıynsha:
1-shi oryn - «Astana medrese kolledji», Haırıddın Nurbergen;
2-shi oryn - «Ábý Hanıfa medrese kolledji», Saıdýlla Qýanysh;
3-shi oryn - «Shymkent medrese kolledji», Anartaev Azızbek.
Bas júldeni ıelengen «Ábý Hanıfa» medresesi shákirti Álıákbar Jádigerge kishi qajylyq joldamasy berildi.
Sýretterdi «FOTOGALEREIa» aıdarynan kóre alasyzdar!
