«Ǵylmanı» meshitindegi «Mektepke jol» aktsııasy 120 balany qamtydy (FOTO+VIDEO)

Búgin «Ǵylmanı» meshitinde de «Mektepke jol» qaıyrymdylyq aktsııasy ótti.

Jyldaǵy úrdis boıynsha elordalyq meıirimdi jandardyń demeýishiligimen jáne meshit qyzmetkerleriniń atsalysýymen 120 balaǵa mektep sómkesi jáne oqý quraldary taratyldy. Sondaı-aq, ár balaǵa 5000 teńgeden qarjylaı kómek kórsetildi.

Sharaǵa respýblıkalyq «Áziret Sultan» meshitiniń naıb ımamy Jumanazar Sadyrhanov jáne «Ǵylmanı» meshitiniń Bas ımamy Nurlan Bekbolatuly qatysty.

Sóz alǵan Jumanazar Óserhanuly búldirshinderdi jańa oqý jylymen quttyqtap, bilim saparlaryna sáttilik tileı kele: «Qazaqstan musylmandary dinı basqarmasynyń uıymdastyrýymenen jyl saıyn dástúrli túrde «Mektepke jol» qaıyrymdylyq aktsııasy ótip keledi. Bıyl elorda meshitteri myńǵa jýyq balany mektepke daıyndap otyr. Osy aktsııaǵa atsalysyp, demeýshilik jasap jatqan atymtaı azamattarǵa Alla rıza bolsyn, kásipterine bereke bersin!», – degen tilegin bildirdi.

Atalmysh aktsııaǵa ata-analar qaýymy dán rızashylyqtaryn jetkizdi. Osylaısha, meshitimizdiń uıytqy bolýymen qalamyzdaǵy kóp balaly jáne turmysy tómen otbasylardan shyqqan mektep jasyndaǵy balalar jańa oqý jylyna daıyn ári kóńildi barýyna járdemdesti.