ǴULAMALAR KEŃESINIŃ MÚShESI HALYQARALYQ KONFERENTsIIaDA BAIaNDAMA JASADY

Ázerbaıjan Respýblıkasynyń astanasy Baký qalasynda ótken ázerbaıjandyq oıshyl, kórnekti ǵalym ári rýhanı ustaz sheıh Seııd Iahııa Bakývıdiń murasyna arnalǵan halyqaralyq ǵylymı-tájirıbelik konferentsııada belgili ıslamtanýshy ǵalym, Qazaqstan musylmandary dinı basqarmasy janyndaǵy Ǵulamalar keńesiniń múshesi Rashıd Muhıtdınov baıandama jasady.

Aıta ketsek, Seııd Iahııa Bakývı – Ázerbaıjan topyraǵynda dúnıege kelip, kúlli túrki-musylman órkenıetiniń rýhanı keńistigine yqpal etken kórnekti tulǵa. Ol XV ǵasyrda ómir súrip, ǵylym men rýhanııatty, bilim men tárbıeni, adamnyń ishki kemeldenýi men qoǵamdyq jaýapkershilikti ózara sabaqtastyrǵan oıshyldardyń biri boldy. Oıshyl ǵulama «Vırd-ı Sattar», «Kashfýl-qýlýb», «Asrarýt-Talıbın», «Manazılýl-Ashıkın», «Shafaýl-asrar» syndy qundy muralar qaldyrdy. Bul shyǵarmalardyń mazmunyna nazar aýdarsaq, Bakývıdiń basty maqsaty adamnyń syrtqy bilimin ǵana emes, ishki álemin de jetildirý bolǵanyn ańǵaramyz.