Forým: Jiger bergen jıyn – Almaty qalasynyń bas ımamy

Almaty qalasynyń bas ımamy Erkinbek Shoqaı III respýblıkalyq ımamdar forýmy din qyzmetkerlerine jaýapkershilik júktegenin tilge tıek etti. 

«Qazaqstan musylmandary dinı basqarmasynyń uıymdastyrýymen ótken «Rýhanı qundylyqtar – qoǵam birliginiń negizi» atty III respýblıkalyq ımamdar forýmy joǵary deńgeıde ótti deýge tolyq negiz bar. Óıtkeni, bul basqosýda «Jeti rýhanı qazyq» Qazaqstan musylmandarynyń Rýhanı tuǵyrnamasy», «Din qyzmetkerleri atqaratyn dinı rásimder tizilimi» jáne «QMDB qurylymyndaǵy dinı laýazymdar tizilimi jáne mindetteri» dep atalatyn úlken mańyzǵa ıe úsh birdeı qujat qabyldandy. Ári atalmysh forýmǵa memleket jáne qoǵam qaıratkerleri, ǵalymdar men belgili teologtar, elimiz boıynsha din salasynda qyzmet etip júrgen bilikti 500 ımamnyń qatysýy jıynnyń salmaǵyn arttyra tústi deýge bolady.

Sondaı-aq, qabyldanǵan qujattar, óz kezeginde, din qyzmetkerlerine tyń serpin berip, úlken jaýapkershilik júkteıtini anyq. Sonymen qosa qujattarda bekitilgen mindetter men qundylyqtar – din qyzmetkerleriniń rýhanı damýyna túrtki bolyp, tulǵalyq kelbetin qalyptastyrýǵa, qoǵammen qarym-qatynasyn jaqsartýǵa, el arasynda adamgershilik pen erekshe qasıettermen úlgi bolýǵa úndeıdi. Al endigi bizdiń maqsat – Qazaqstan musylmandary dinı basqarmasynyń tóraǵasy, Bas múftı Serikbaı qajy Orazdyń bastamasymen qabyldanǵan qujattar negizinde nasıhat jumystaryn júrgizip, din qyzmetkerleriniń jumys sapasyn arttyryp, el-jurtymyzdy ımandylyqqa baýlý», – deıdi Erkinbek Shoqaı.