EÝRAZIIa ELDERINIŃ HALAL SALASY ÓKILDERI ALMATYDA BAS QOSTY

Búgin Almaty qalasyndaǵy Nur-Múbárak Egıpet ıslam mádenıeti ýnıversıtetinde «Eýrazııalyq Halal Odaǵynyń» kezekti otyrysy ótti. Jıyn oflaın jáne onlaın formatta uıymdastyryldy.

Basqosýǵa Qazaqstan, Reseı, Belarýs, Qyrǵyzstan jáne Ózbekstannyń halal salasyna jaýapty ókilderi qatysty. Qazaqstan tarapynan QMDB Tóraǵasy, Bas múftı Naýryzbaı qajy Taǵanulynyń tapsyrmasymen «Halal Damý» JShS dırektory, Odaqtyń teń tóraǵasy Aıbek Atashev qatysty.

Jıyndy Aıbek Asqarbekuly ashyp, qatysýshylarǵa sáttilik tiledi. Odan ári bes memlekettiń ókilderi óz elderindegi halal sertıfıkattaý júıesiniń qazirgi jaǵdaıy men atqarylyp jatqan jumystar jóninde baıandama jasady.

Otyrys barysynda Eýrazııa keńistigindegi halal ónimder, qyzmetter men júıelerdi sertıfıkattaýdyń biryńǵaı standartyn qalyptastyrý, akkredıtteý talaptaryn úılestirý, Odaqtyń uıymdyq-quqyqtyq qurylymyn jetildirý jáne múshe elder arasyndaǵy ózara yntymaqtastyqty nyǵaıtý máseleleri talqylandy.

Jıyn qorytyndysynda taraptar aldaǵy birlesken jumystyń negizgi baǵyttaryn aıqyndap, 2026–2027 jyldarǵa arnalǵan is-sharalar josparyn talqylady.