«Ertuǵyryl» fılminiń rejısseri Qoja Ahmet Iasaýı kesenesin zııarat etti (FOTO)
Búgin belgili rejısser Metın Gıýnaı «Áziret Sultan» memlekettik tarıhı-mádenı qoryq-mýzeıine keldi. Qoja Ahmet Iasaýı kesenesine zııarat jasap, babalar rýhyna taǵzym etken rejısser jerasty qylýeti men shyǵys monshasy, Rábııa Sultan begim ana kesenesi jáne qundy muralarmen tanysty, - dep habarlaıdy «Otyrar».
«Ata jurtqa ańsap jettim. Erekshe áserdemin. Túrkistan - ekinshi Mekke. Túrkistan - qasıetke eń baı jer. Túrkistan - tarıhtyń jeri. Munda kelgen árbir azamat basyn ıip, qasıetine alǵys aıtyp kelýi kerek. Túrki jurtynyń tulǵasy Qoja Ahmet Iasaýı babamyzdyń qabiriniń ózi adamzat balasyn sabyr men ımanǵa, meıirim men izgilikke shaqyryp turǵandaı. Jádigerleriniń ózi ata - babamyz til qatyp turǵandaı únsiz ǵana sóıleıdi. Eldiń yrysy men berekesiniń sımvoly taıqazannyń turysy qandaı áserli. Qanshama ǵasyrdy basynan ótkergen kirpishterdiń erekshe kórinisi janyńa óz sharapatyn syılasa, qudyqtyń zámzám sýynyń ózi ǵasyrlar dámin sezdiredi», – deıdi Metın Gıýnaı.
Aıta keteıik, kınosúıer kórermenge esimi keńinen belgili qoıýshy-rejısser, «Ertuǵyryl» serıalynyń avtory ári rejısseri Gıýnaı Metın eki kún boıy Otyrartóbe, Saýran qalashyqtarymen tanysqan bolatyn. Elbasynyń arnaıy shaqyrýymen Qazaqstanǵa kelip, dańqty batyr - Qasym han jaıly kóp serıaly fılm túsirýdi qolǵa alǵan rejısser jobaǵa tarıhı oryndardy izdestirip jatyr.
Osyǵan deıin, QR mádenıet jáne sport mınıstri Arystanbek Muhamedıuly Metın Gıýnaımen birge Otyrar aýdanyna baryp, Otyrar qalashyǵyn aralady. Uly Jibek joly boıyndaǵy mádenıet pen rýhanııattyń ortalyǵy atanǵan kóne qala Otyrarǵa jasalǵan sapardyń maqsaty - qazaq handyǵy men tarıhy, dańqty batyr Qasym hannyń el bolashaǵy úshin aıanbaı sińirgen eńbegi jaıly tarıhı fılm túsirýdi kıeli Otyrar jerinen bastaý, tamyry tereń tarıhymyz ben batyrlar jolyn tek Qazaqstanǵa ǵana emes dúnıejúzine tanytý.
Osy oraıda Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaevtyń arnaıy shaqyrtýymen aýqymdy jobany qolǵa alǵan tanymal rejısser Metın Gıýnaı jyldyń tórt mezgilin de qamtı otyryp úsh jyl ishinde kóp serıaly tarıhı fılm túsirýdi qolǵa alǵan. Kıno arqyly elimizdiń uly tulǵalaryn álemge tanytý maqsatynda QR Mádenıet jáne sport mınıstrligi keńinen qoldaý tanytýda.
«Ertuǵyryl" kınosynyń rejısseri Metın Gıýnaı Elbasynyń shaqyrýymen Qazaqstanǵa kelip úlken jobany qolǵa alýda. Qasymhan jaıly kınonyń stsenarııin keremet etip jazyp shyqty. Bul joba - kúrdeli ári aýqymdy bolǵandyqtan biz jan-jaqty daıyndyq jumystaryn júrgizip jatyrmyz. Maqsatymyz ónerdiń barlyq salasynyń jumystaryn bir júıege keltirip toǵystyrý. Osy iri jobalardyń arqasynda kóne qalalarymyz Otyrar, Saýran, Saraıshyqtardy dúnıejúzine pash etý. Atalǵan iri jobalarmen qatar tarıhı oryndarǵa restavratsııalyq jumystar júrgiziledi. Arheologııalyq qazba jumystary arqasynda da kóptegen derekter tabyldy. Olardy da tanytyp, tarıhymyzdy jandandyrýymyz tıis.Tarıhymyzdy shyǵarý arqyly dúnıejúzi týrısterin Qazaqstanǵa shaqyra alamyz», – dedi Arystanbek Muhamedıuly.
«Ata topyraǵymyzǵa kelgenime qýanyshtymyn. Osy ólkeni maǵan arnaıy kelip tanystyrǵan mınıstr Arystanbek Muhamedıulyna erekshe alǵysymdy aıtamyn. Bizdiń tarıhymyz ortaq. Tarıhı tulǵanyń ómiri jaıly túsirilim bastaýdy qolǵa alyp jatyrmyz. Dál qazir bizdiń túsirilimge keletin yńǵaıly oryndarmen tanysyp jatyrmyz. Úlken is jasaýdy josparlaǵandyqtan shynaıy, tarıhı jerlerdi qarastyrýdamyz. Taǵy da úsh meken josparda bar»,- dedi Metın Gıýnaı.
