Ershat Aǵybaıuly «Nur Astana» meshitinde juma ýaǵyzyn júrgizdi (FOTO+VIDEO)

Búgin «Nur Astana» meshitinde QMDB tóraǵasynyń orynbasary, naıb múftı Ershat Aǵybaıuly Ońǵarov «Islamdaǵy áıel mártebesi» taqyrybynda juma ýaǵyzyn júrgizdi.

Otbasy ulttyń uıytqysy bolsa, áıel – otbasynyń quty. Shaǵyn memleket – otbasynyń berekesi artyp, tútini túzý shyǵýy úshin er men áıeldiń óz mindetterin durys, ornymen atqara bilýi óte mańyzdy.

Naıb múftı Ershat Ońǵarov áıel adamnyń mindeti men mártebesi jaıynda jumaǵa jınalǵan qaýymǵa keńinen tarqatyp, túsindirdi:

«Er adam men áıel zaty ózderine tán tabıǵatyndaǵy erekshelikterin eskergende ǵana ekeýi bir-birin tolyqtyra túsedi. Qazaq «eki jarty bir bútin» degen. Áıel denedegi júrek bolsa, erkek sol denedegi aqyl ispetti. Júrek aqylsyz, aqyl júreksiz ǵumyr súre almaıdy. Júrekti aqyldan joǵary, ıakı aqyldy júrekten artyq dep aıtý múmkin emes. Ekeýi óz mindetterin atqarǵan kezde ǵana dene durys qyzmetin jalǵastyra alady. Qasıetti Quran Kárimde

«Áıelderdiń kúıeýleri aldynda mindetteri bolǵanyndaı, er azamattardyń da áıelderiniń aldynda zańdy mindetteri bar». Bul jerdegi mindet – er adamnyń januıa nápaqasyn tabý, áıelge kórkem minezben qarym-qatynas jasaý, zııan keltirmeý».

Namaz sońynda elimizdiń tynyshtyǵy men amandyǵy úshin duǵa jasaldy.