Erlan Qoshanov: QMDB qoǵamda óz ornyn taba bildi (FOTO)

Elorda tórinde ótip jatqan III Respýblıkalyq ımamdar forýmynda sóz alǵan Qazaqstan Respýblıkasy Prezıdenti Ákimshiliginiń basshysy Erlan Qoshanov múftııattyń qoǵamdaǵy orny men rólin aıryqsha atap ótti.

«Búgingi Forým Qazaqstan musylmandary dinı basqarmasynyń uıymdastyrýshylyq-aǵartýshylyq qyzmetin jańa bir beleske kóterip, din salasyndaǵy jańa bastamalarǵa tyń rýhanı serpin beretinine senimdimin. Qazaqstan musylmandary dinı basqarmasy – elimizde halyqtyń kóńilinen shyǵatyn ımandy áreketterge uıytqy bolyp, qoǵamda óz ornyn taba bildi.

Búgingi meshit ımamdarynyń halyq arasynda júrgizetin aýqymdy isteri Qazaqstan musylmandarynyń rýhanı suranysyna qaltqysyz qyzmet etýdiń jarqyn kórinisine aınaldy.

Sonymen qatar, qoǵamdaǵy birlik pen kelisimdi, tatýlyq pen beıbitshilikti nyǵaıtýǵa da aıanbaı úlesterin qosýda», – dep atap ótti Erlan Jaqanuly.