Elordanyń belsendi jastary Ramazan shatyrynda bas qosty

«Nur Astana» meshitinde astanalyq jastar uıymdarynyń belsendi jetekshileri bas qosty.

QMDB tóraǵasy, Bas múftı Serikbaı qajy Oraz ústimizdegi jyldy «Islam jáne jastar jyly» dep ataǵany belgili. Osy oraıda «Nur Astana» meshiti astanalyq belsendi jastardyń basyn qosyp, aýyzashar berdi. Atap aıtar bolsaq, «Jas Otan» JQ, Qazaqstan stýdentter alıansy, «Bolashaq» stıpendıattar assotsııatsııasy, Qazaqstannyń Jastar kongresi, QR áskerı kúshteriniń áskerı-patrıottyq ortalyǵy, «Jas sarbaz» áskerı-patrıottyq uıymy, Nazarbaev Ýnıversıteti, L.N.Gýmılev atyndaǵy Eýrazııa ulttyq ýnıversıteti jáne taǵy basqa jastarmen jumys isteıtin uıymdar men elordalyq joǵary oqý oryndarynyń jastarmen jumys bóliminiń jetekshileri keldi.

Ǵanıbetke toly otyrys barysynda «Nur Astana» meshitiniń Bas ımamy elimizdiń ekpindi jastarymen keleli áńgime órbitip, rýhanı serpilis mezgili sanalatyn Ramazan aıynyń qadir-qasıeti men qazirgi jastar ómirinde rýhanııattyń mańyzy jaıly aıtty. «Asyl tastan, óner jastan» demekshi, elimizdiń erteńgi úmiti sanalǵan jastar da óz kókeıinde júrgen saýaldaryn surap, rýhanııat jaıynda pikirlerimen bólisti.