Elordamyzdyń eń úzdik qarılary anyqtaldy (FOTO+VIDEO)

27 naýryz 2019 9354 0 Оqý rejımi

Búgin Nur-Sultan qalasynda Quran Kárimdi jatqa jáne mánerlep oqýdan VIII Respýblıkalyq Quran jarysyna irikteý saıysy ótti. Ókildik boıynsha irikteý saıysyna Elordamyzdaǵy 10 meshit pen «Astana» medrese-kollejiniń, Saýat ashý ortalyǵynan kelgen 33 úmitker qatysyp, ózara baq talastyrdy.

Úmitkerler arasynan úzdigin anyqtap, Respýblıkalyq dodada Elordamyzdyń namysyn qorǵaıtyn bilgirin baǵalaý tóreligi «Qaýam ad-Dın ál-Itqonı ál-Farabı at-Túrkistanı» respýblıkalyq qarılar daıarlaý ortalyǵynyń dırektory Sádýaqas qarı Oljabaıuly, «Astana» medrese-kolledjiniń ustazy Abdýssamıǵ Alı, respýblıkalyq «Áziret Sultan» meshitiniń naıb ımamy Jumanazar qarı Óserhanuly syndy tanymal qarılarǵa júkteldi.

Qatysýshylar «30 para», «20 para», «10 para» atalymdary boıynsha jatqa oqýdan óz biliktilikterin synasa, «Mánerlep oqý» atalymy boıynsha Quran Kárimdi mánerlep oqyp ózderiniń qarym-qabiletin synǵa saldy.

Ádilqazylar shákirtterdiń qyraǵaty men oqý máneri, durys dybystaý, t.b. tehnıkalyq sheberlikterine jiti nazar aýdardy. Nátıjesinde, júzden júırik shyqqan shákirtterge arnaıy dıplomdar men qarjylaı syılyqtar berildi. Al, «30 para» atalymy boıynsha úzdik shyqqan Abdýǵappar Tursynovqa kishi qajylyqqa joldama berildi.

Júzden júırik atanǵan jeńimpazdardy marapattap, izgi tilegin arnaǵan QMDB tóraǵasynyń birinshi orynbasary, naıb múftı Naýryzbaı qajy Taǵanuly Quran jarysynyń uıymdastyrýdaǵy basty maqsat – jastardy ımandylyqqa uıytyp, izgilikke úıretý ekenin atap ótti. Quran oqylǵan jerde bereke baryn, yntymaq pen birliktiń gúldene túsetinin tilge tıek etken Naýryzbaı qajy Taǵanuly barlyq qatysýshylarǵa ynta-talaptary muqalmastan, Allanyń sózi – qasıetti Quran Kárimge degen mahabbattary kúsheıip, zeıinderi arta túsýine tilektestigin jetkizdi.