ELORDADA JASTAR ARASYNDA ShAǴYN FÝTBOLDAN TÝRNIR ÓTTI
Elordada Qazaqstan musylmandary dinı basqarmasy Jastar isi sektorynyń uıymdastyrýymen El táýelsizdiginiń 35 jyldyǵyna oraı jastar arasynda shaǵyn fýtboldan «Jastar kýbogy» týrnıri ótti.
Sporttyq sharanyń ashylý saltanatyna Bas múftı Naýryzbaı qajy Taǵanuly, QR Mádenıet jáne aqparat mınıstrligi Jastar jáne otbasy isteri komıteti tóraǵasynyń orynbasary Aqulan Óseruly, Astana qalasynyń Bas ımamy Nurbek Áýeshanuly, Múftııat qyzmetkerleri men arnaıy qonaqtar qatysty.
Saltanatty jıynda Bas múftı jarysqa qatysýshylar men uıymdastyrýshylarǵa alǵys aıtyp, týrnırdiń ádil ári tartysty ótýine tilektestik bildirdi.
Al Aqulan Óseruly sporttyq sharaǵa shaqyrǵany úshin rızashylyǵyn bildirip, Jastar jáne otbasy isteri komıteti jastardyń kez kelgen ıgi bastamasyn qoldaýǵa daıyn ekenin jetkizdi.
Týrnırge barlyǵy 6 komanda qatysyp, ózara myqtyny anyqtady. Atap aıtqanda, QMDB atynan «Múftııat jastary» jáne «Zeıin» komandalary, Astana qalasy meshitteriniń quramasy, «Syǵanaqı» ınstıtýty, Astana medrese-kolledji jáne «Munara» telearnasynyń komandasy baq synady.
Tartysty ótken jarystyń qorytyndysy boıynsha júldeli oryndar tómendegideı bólindi:
I oryn – «Múftııat jastary» komandasy (150 000 teńge);
II oryn – «Astana qalasy meshitteri» komandasy (100 000 teńge);
III oryn – «Zeıin» komandasy (80 000 teńge).
Jarys sońynda jeńimpaz komandalar men úzdik oıynshylar marapattaldy. Týrnır jastardyń ózara dostyǵyn nyǵaıtyp, salaýatty ómir saltyn nasıhattaýǵa jáne dinı ortadaǵy birlikti arttyrýǵa baǵyttalǵan ıgi shara boldy.

















