Elordada jańa meshit ashyldy (FOTO+VIDEO)

Búgingi qasıetti juma Elorda jamaǵaty úshin aıryqsha qýanyshqa toly boldy. Qala shetinde ornalasqan Baıqońyr aýdanyndaǵy Óndiris eldimekeninde "Ár-Rahman" meshitiniń qurylysy aıaqtalyp, halyq ıgiligine paıdalanýǵa berildi.

Halyq sany tyǵyz ornalasqan bul aýdandaǵy basty máselelerdiń biri - qulshylyq ordasynyń joqtyǵy bolatyn. Kópten kútken qýanyshty oqıǵaǵa jıylǵan jamaǵattyń kóptigi de osyny ańǵarta túskendeı. Alysqa sabylmaı, jaqyn jerde Jaratqanǵa qulshylyq jasaýǵa múmkindik týǵanyna turǵyndardyń barlyǵy da dán rıza.

Quran aıattarymen shymyldyǵy ashylǵan ıgi sharaǵa QMDB tóraǵasynyń birinshi orynbasary, naıb múftı Naýryzbaı qajy Taǵanuly arnaıy qatysyp, qasıetti qulshylyq ordasynyń tusaýyn kesti. Sondaı-aq, jamaǵatpen juma namazy oqylyp, sol aýyldyń aýyzy dýaly aqsaqaldary kópshilikke batasyn berdi.

Aıta ketsek, buryn "Nur Astana " meshitinde naıb ımam bolyp qyzmet atqarǵan Rýslan Baızaqov "Ár-Rahman" meshitiniń bas ımamy bolyp taǵaıyndaldy.

Sýretterdi «FOTOGALEREIa» aıdarynan kóre alasyzdar!