Elordada qasapshylarǵa arnalǵan semınar-trenıng ótti (FOTO)

Qasıetti Qurban aıt merekesi qarsańynda Nur-Sultan qalasyndaǵy respýblıkalyq «Áziret Sultan» meshitinde «Qasapshylyq – saýapty hám jaýapty is» atty semınar-trenıng bolyp ótti. Nur-Sultan ókildiginiń uıymdastyrýymen ótken semınar barysynda Bas shahardaǵy qurban shalatyn oryndarda qyzmet atqarýǵa tıisti azamattar qatysyp, tájirıbe jınaqtady.

Alqaly jıynǵa QMDB-ǵa qarasty «Halal Damý» JShS dırektory Ánýar Izimbaıuly, Nur-Sultan ákimdigi Qoǵamdyq damý basqarmasynyń bas mamany Ádilet Tóleýtaıuly, Qalalyq orta sapasy jáne baqylaý basqarmasynyń Veterınarııa jáne ósimdikterdi qorǵaý bóliminiń basshysy Áshim Ábilqadyruly syndy jaýapty mamandar shaqyrylyp, semınarǵa qatysýshy 30-dan astam qasapshy azamattarǵa sharıǵat talaptaryna sáıkes mal soıýdyń jón-josyǵy túsindirildi. Semınar sońynda barlyq qatysýshylarǵa arnaıy sertıfıkat tabystaldy.

Aıta keteıik, bıylǵy Qurban aıt merekesinde Nur-Sultan qalasy boıynsha qurban shalatyn 7 oryn bekitilip otyr. Atalmysh oryndar arnaıy sanıtarlyq tekserýden ótkizilip,  aıtýly merekege saqadaı-saı ázirlengen. Buǵan qosa, bul jerlerde dinı rásimder atqarýǵa Elordamyzdaǵy 30-dan astam dinı qyzmetker bekitilgen.

Sýretterdi «FOTOGALEREIa» aıdarynan kóre alasyzdar!