ELORDADA MEDRESE ShÁKIRTTERINE AÝYZAShAR BERILDI (FOTO)

Elordada Qazaqstan musylmandary dinı basqarmasy Jastar isi jáne Áıel-qyzdar sektorlarynyń uıymdastyrýymen medrese shákirtterine aýyzashar berildi.

Rýhanı is-shara Quran aıattaryn oqýmen bastalyp, Bas múftı Naýryzbaı qajy Taǵanuly duǵa jasady. Sondaı-aq QMDB Tóraǵasy jınalǵan jamaǵatqa orazasy qabyl bolýyn tilep, Ramazan aıy Allanyń syıy ekenin eske saldy.

«Bul aı – adam balasyn taqýalyq dárejege jetkizýge sebepshi bolatyn aı. «Taqýalyq» degen ne?» deıtin bolsaq, Alla Taǵala Quran Kárimde bylaı deıdi: «Allanyń aldyndaǵy eń qadirli adam – taqýa adam» – degen. Iaǵnı, taqýa adam – Allanyń aldynda eń syıly adam. Al taqýalyqqa adam balasy oraza ustaý arqyly jetedi» – dedi Naýryzbaı qajy Taǵanuly.

Sonymen qatar, aýyzashar dastarhany barysynda qasıetti aı týraly «Munara» telearnasy daıyndaǵan áserli beınerolık kórsetildi. Al QMDB-nyń ónerli jastary Tımýr Orynhanov, Baǵyjan Kúzekbaı jáne Temirlan Saılaýbek jarapazan aıtyp, halqymyzdyń dástúrin pash etti. Keshti júrgizgen telejúrgizýshi Janserik Berikqazyuly túrli qyzyqty ári tanymdyq oıyndar oınatsa, kúı tartylyp, kópshilik tánti boldy. Jamaǵat is-sharadan jan dúnıesi baıyp shyqqanyn aıtyp, tarqasty.

Aıta keteıik, rýhanı is-sharaǵa QMDB qyzmetkerlerimen birge «Astana» medrese-kolledjiniń shákirtteri, sondaı-aq óner salasynyń belgili ókilderi qatysty.

​