Elordada «Máńgi muǵjıza» atty Quran jarysy ótti (FOTO+VIDEO)
Elordadaǵy «Rahymqyzy Raısa ana» meshitinde «Máńgi muǵjıza» atty Quran jarysy bolyp ótti. Jarysqa «Nur-Sultan» qalasy ókildiginiń 12 meshiti arasynan iriktelgen 12 shákirt qatysty.
QMDB 30 jyldyǵynyń aıasynda ótken bul sharada qatysýshylar Qurannyń 30-parasynyń 30 súresinen jatqa oqý, tájýıd erejeleri men Quran jaıly suraqtarǵa jaýap berip, ózara baq synasty.
«Áýeli aıat, hadıs – sózdiń basy, Qosarly báıit-mysal keldi arasy. Qısynymen qyzyqty bolmasa sóz, Nege aıtsyn Paıǵambar men ony Allasy...», - dep Abaı atamyz jyrlaǵandaı aldymen Quran oqýmen bastalǵan sharanyń alǵysózin Zańqoev Qalıjan ustaz sóıledi. Ol óziniń ómirlik tájirıbesimen bólisip, qatysýshylarǵa sáttilik tilep, aq batasyn berdi. Sharaǵa tórelik etýge respýblıkalyq azanshylar saıysynyń Bas júldegeri, «Áziret Sultan» meshitiniń azanshysy Erlan Bazarbaıuly, «Ǵylmanı» meshitiniń ustazy Nýrıddın Abdýsamaduly, «Raısa Ana» meshitiniń qarıy Abdýalı Shahıdanıuly arnaıy shaqyryldy. Ádilqazylardyń sheshimimen Bas júlde «Ál-Ǵanı» meshitiniń shákirti Bekarys Baımuratulyna, 1-oryn «Nur-Astana» meshitiniń shákirti Bektas Jeńisulyna, 2-oryn «Raısa Ana» meshitiniń shákirti Sabyrbek Yqylasulyna jáne 3-oryn «Áziret Sultan» meshitiniń shákirti Dinmuhammed Seıithanuly buıyrdy.
Shákirtterdiń yntasyn arttyrý jáne jalpy jamaǵatty Quran oqýǵa qyzyqtyrý nıetimen Bas júldege smart-televızor TCL 40D, 1-orynǵa telefon REALME C11, 2-orynǵa planshet OPPO A1k jáne 3-orynǵa sapaly kilem syndy syılyqtar berildi. Sondaı-aq, árbir qatysýshyǵa yntalandyrý sertıfıkattary men qarjylaı syı-sııapat jasaldy. Bul jarystyń ereksheligi respýblıkalyq dárejedegi jarystarǵa qatysa almaǵan meshit shákirtterin ózara qala kóleminde jarystyryp, baq synatý edi. Ál-Farabı babamyz «Adam maqsatyna ózin-ózi jetildirý arqyly jetedi» degenindeı, negizgi maqsatymyz – shákirtterdi Qurandy jattap, oqyp qana qoımaı, onyń durys-burysyn dúbirli dodada tekserip kórýge talpyndyrý.
