ELORDADA I RESPÝBLIKALYQ «QAIYRYMDYLYQ JARSHYLARY» ERIKTILER FORÝMY ÓTTI (FOTO)
Búgin elordasy Astana qalasynda Qazaqstan musylmandary dinı basqarmasyna qarasty «Zeket jáne qaıyrymdylyq» qorynyń uıymdastyrýymen «QAIYRYMDYLYQ JARSHYLARY» birinshi respýblıkalyq eriktiler forýmy ótti.
Forým jumysyna QMDB Tóraǵasy, Bas múftı Naýryzbaı qajy Taǵanuly bastaǵan múftııat ujymy men din qyzmetkerleri, qoǵam qaıratkerleri, kásipkerler men BAQ ókilderi, sondaı-aq «Zeket jáne qaıyrymdylyq» qorynyń óńirlerdegi ókilderi men eriktiler qatysty. Qasıetti Quran aıattary oqylyp, Bas múftı el amandyǵy úshin duǵa jasap, is-sharanyń sátti ótýin tiledi.
Sondaı-aq alǵashqy bolyp sóz alǵan QMDB Tóraǵasy Naýryzbaı qajy Taǵanuly din jolynda erikti túrde qyzmet etýdiń mańyzy men saýabyn aıryqsha atap ótip, ásirese jastardyń tabandylyǵy qaıyrymdylyq isterinde erekshe kórinip turatynyn tilge tıek etti.
«Quran Kárimdegi «Káhf» súresinde ımanyn saqtap, úńgirge jasyrynǵan jastardyń oqıǵasy baıandalady. Osy súrede: «Olar ıman keltirgen jastar edi» dep sıpattalady. Sol jastardyń oqıǵasy keıingi tolqyndarǵa úlgi retinde kórsetildi.
Jaratqan Jábbar Haqtan ýahı túskende Paıǵambarymyzdyń (oǵan Allanyń salaýaty men sálemi bolsyn) jasy qyryqta bolatyn. Al nasıhatyna erip, ımanǵa kelgenderdiń basym bóligi jastar edi. Alǵash ıman keltirgen kezde Álıdiń jasy 8-de, Talha ıbn Ýbaıdýlla 11-de, Abdýlla ıbn Masǵut 14-te, Saǵyd ıbn Ábý Ýaqqas 17-de, Zýbeır ıbn Aýýam (barshasyna Alla razy bolsyn) 18-de edi.
Bulardyń barlyǵy Paıǵambar (oǵan Allanyń salaýaty men sálemi bolsyn) mektebiniń parasatty da alǵyr túlekteri bolatyn. Áýeli Allanyń qalaýymen, sosyn sol jastardyń jumyla kúsh salýymen Haqtyń qasıetti sózi, ıaǵnı Quran Kárim kitabymyz shartarapqa jaıyldy.
Prezıdentimiz Qasym-Jomart Kemeluly elimizde ótken eriktiler jylynyń jabylý rásiminde: «Eriktiler jyly jalyndy jastarymyzdyń boıyndaǵy eń asyl qasıetterdi dáriptegen erekshe jylǵa aınaldy. Bul janashyrlyqqa, jaýapkershilik pen qamqorlyqqa úndegen kezeń boldy. Biz muqtaj jandarǵa qol ushyn berip, túrli qıyndyqtarmen birge kúrestik. Osylaısha, adamgershilik qundylyqtardy joǵary baǵalaıtyn qoǵam ekenimizdi tanyttyq. Eriktiler – ózgeniń máselesin óz isindeı kóretin júregi keń, nıeti durys jandar. Bizdiń elimiz dál osyndaı azamattardan kende emes. Sizderdiń qoǵam úshin jasaǵan paıdaly isterińiz, kópshiliktiń ystyq yqylasy men aq batasy – sonyń aıqyn dáleli» degen bolatyn.
Rasynda, naǵyz janashyr adam erikti bola alady. Osy forýmda qabyldanatyn qujattar «Zeket jáne qaıyrymdylyq» qorynyń ıgi bastamalaryn qoldaıtyn eriktiler qatarynyń kóbeıýine, saýapty isterdiń basy-qasynan tabylatyn jandardyń belsendiligine yqpal etedi senemin» dedi Bas múftı.
Aıta keteıik, forým barysynda «QAIYRYMDYLYQ JARSHYLARY» eriktileriniń tuǵyrnamasy», «eriktiler kúni» jáne eriktilerdiń jyldyq jospary bekitildi. Sondaı-aq «Úzdik qaıyrymdylyq joba» tańdalyp, «Jyl janashyry» anyqtaldy jáne «Zeket jáne qaıyrymdylyq» qorynyń dırektory Maqsatbek Qaıyrǵalıev qazirgi tańdaǵy atqarylyp jatqan jobalardy tanystyryp ótti.
