Elordada ál-Farabı men Abaı mereıtoıynyń tujyrymdamasy bekitildi
Elordada ál-Farabıdiń 1150 jyldyq jáne Abaıdyń 175 jyldyq mereıtoıyn atap ótý boıynsha arnaıy jospar qurylyp, tujyrymdama bekitildi, dep jazady QazAqparat.
«Bıyl elimizde birneshe aıtýly mereıtoı men datalardy atap ótkeli otyrmyz. Atap aıtqanda, Abaıdyń — 175, Ábý-Nasyr ál Farabıdiń — 1150, Altyn Ordanyń — 750 jyldyǵy. Osy oraıda el ordasy — Nur-Sultan qalasynda ótetin mańyzdy is-sharalardy talqylaý úshin jınalyp otyrmyz. Odan bólek, bıyl II dúnıejúzilik soǵystyń aıaqtalǵanyna 75 jyl, Konstıtýtsııamyzǵa — 25 jyl jáne Qazaqstan halqy assambleıasyna — 25 jyl tolady. Elimiz úshin mańyzdy sharalardyń elordadan bastaý alatynyn bilesizder. Sondyqtan biz árbir iske jaýapkershilikpen qaraýymyz kerek. Ál-Farabı men uly Abaıdyń mereıtoıy qaǵaz júzindegi sharalarmen ǵana ótpeýi tıis», — dedi qala ákiminiń orynbasary Baqtııar Máken ákimdikte ótken jıynda.
Sondaı-aq, ákim orynbasary elordada ótetin sharalarǵa jaýapty basqarmalar men uıymdar daıyndyqty kúsheıtýi kerektigin qadap aıtty.
«Abaıdyń 175 jyldyǵy men Ábý-Nasyr ál Farabıdiń 1150 jyldyq mereıtoıyn atap ótý boıynsha tıisti jospar bekitildi. Arnaıy tapsyrma bar. Onyń ishinde qalalyq deńgeıde ótetin is-sharalardyń tujyrymdamasy jasalyp, bekitildi. Bas qalada mereıtoıǵa oraı naqty ister qolǵa alynýda, sonyń biri — «Abaı álemi» ortalyǵy. Elordada bas aqynǵa arnalǵan ortalyq bolýy tıis. Ortalyqtan qala turǵyndary men qonaqtary Eksponatty ǵana tamashalap qoımaı, rýhanı azyq alatyndaı bolýy qajet. Abaı — jan-jaqty tulǵa, sondyqtan ol ortalyqqa biz aqyn-jazýshylarmen qatar sýretshi, tarıhshy, mýzykanttardy da tartýymyz kerek. Sebebi Abaı álemi keń. Osy oraıda kitap shyǵardyq, qazir ony tolyqtyryp jatyrmyz. Ol úlken joba bolaıyn dep tur, aldaǵy ýaqytta arnaıy májilis ótkizip, tanystyramyz. Jáne árbir sharaǵa jaýapty uıymdar men mekemeler daıyndyqty kúsheıtýi tıis», — dedi ol.
