Elorda jańa meshit ashylyp, alǵashqy juma namazy oqyldy (FOTO)

Búgin, qasıetti juma kúni Elordada 11-shi meshit jamaǵatqa esigin aıqara ashty. Qoǵam qaıratkerleri men zııaly qaýym ókilderi, qala turǵyndary meshittiń ashylý saltanatyna qatysyp, toǵyz joldyń toraby, «Nur-Sultan» temir jol vokzaly mańynda salynǵan záýlim ǵımaratpen tanysty.

«Raısa ana» dep atalatyn meshittiń ashylý sátinde sóz sóılegen QMDB tóraǵasy, bas múftı Serikbaı qajy Oraz:

«Meshit – adamdardy meıirimdilikke, súıispenshilikke shaqyratyn, bir-birine qamqor bolyp, qol ushyn beretin, muqtaj bolǵan adam janyna tynyshtyq tabatyn, sondaı bir qasıetti, ulyq meken. Bul – ımandylyqtyń, ımandylyqtyń, bilimniń, ǵylymnyń ordasy. Keshegi Qaraótkelden kele jatqan Aqmola, keshe ǵana halqymyzdyń basyn biriktirgen Astana, búgin nurlanyp damyp jatqan Nur-Sultan qalasynda halyqtyń negizgi bóligi shoǵyrlanǵan jerge meshit kópten beri qajet edi. Minekı, Elbasymyzdyń tapsyrmasymen dál osy halyq tyǵyz ornalasqan jerge meshit saldyrǵan áýletke Alla razy bolsyn deımiz, — dedi.

Aıta keteıik, bas qalanyń oń jaǵalaýynda boı kótergen jańa meshitke bir mezette 1500-2000 adam erkin syıyp, qulshylyǵyn óteı alady. Sondaı-aq, meshit janynan as berýge, Ramazan aıynda aýyzashar berýge yńǵaıly ashana da ashylyp otyr.

Qasıetti juma kúnine oraı ashylǵan qulshylyq ordasy jamaǵatqa birden lyq tolyp, saltanatty shara juma namazyna jalǵasty. QMDB tóraǵasynyń birinshi orynbasary, naıb múftı Naýryzbaı qajy Taǵanuly «Kásiptegi adaldyq» taqyrybynda ýaǵyz júrgizip, jamaǵatty rýhanı sýsyndatty. Budan keıin meshit jamaǵatyna Bas múftı buıryǵyn oqyp berip, jańa meshittiń bas ımamy bolyp taǵaıyndalǵan Qalıjan Zańqoevty tanystyrdy. Buǵan deıin osy qaladaǵy «Áljan ana» meshitiniń bas ımamy qyzmetin jemisti atqaryp kelgen Qalıjan ımamdy jańa qyzmetimen quttyqtap, jumysyna sáttilik tiledi.

Sýretterdi «FOTOGALEREIa» aıdarynan kóre alasyzdar!