Elorda tórinde Máýlit merekesi toılandy (FOTO+VIDEO)
Búgin Elorda tórinde adamzattyń asyl táji Muhammed (s.ǵ.s.) paıǵambarymyzdyń qurmetine oraı «Ǵalamnyń raqym nury» atty Máýlit keshi bolyp ótti. Jeksenbi kúnin súıikti paıǵambarymyzǵa (s.ǵ.s.) salaýat aıtyp, súıispenshiligin bildirýmen bastaýdy qup kórgen Elorda halqy rýhanı keshke erte jınaldy. Árbir kelýshige taratylǵan appaq sharlar men gúlder, rýhanı kitaptar salynǵan arnaıy paketter búgingi merekeniń shýaǵyndaı bolyp, kóńilderge qýanysh quıa tústi.
Qasıetti Quran aıattarymen bastaý alǵan Máýlit keshi ardaqty Paıǵambarymyzǵa (s.ǵ.s.) joldanǵan sansyz salaýattarmen berekelendi. QMDB tóraǵasy, Bas múftı Serikbaı qajy Oraz barsha múminderdiń mereıli merekesi – Máýlit meıramymen quttyqtap, Áz Elshige (s.ǵ.s.) degen mahabbat ımanymyzǵa qýat, janymyzǵa azyq ekenin atap ótti. Arqa tórindegi alqaly jıynǵa Elorda qalasynyń ákimi de óz izgi tilegin joldap, shahar turǵyndaryn mereıli merekemen quttyqtady.
Kesh aıasynda elimizge belgili qarı Jumanazar Sadyrhanov pen Arman Ǵabdýllınniń qos tilde oryndaǵan Máýlit jyrynyń kórermender úshin orny bólek bolǵandaı. Sondaı-aq, Paıǵambarymyzǵa (s.ǵ.s.) degen saǵynyshtaryn ánmen jetkizgen Qurmash Mahanov, Beıbit Qushqalıev, Serjanáli Álibek syndy óner juldyzdary da búgingi keshtiń shyraıyn kirgize tústi. Elimizge belgili «Óner qyrandary» teatry da rýhanı keshke óz úlesterin qosyp, kórermenge «Paıǵambardy (s.ǵ.s.) saǵyný» qoıylymyn usyndy. Óner jolyn endi ǵana attaǵan Muhtarqyzy Ámına esimdi búldirshinniń búgingi keshtegi monology talaıdyń kózine jas úıirgendeı. Kesh barysynda QMDB bólim meńgerýshisi Batyrjan Mansurov Paıǵambarymyzdyń (s.ǵ.s.) tálimi jaıynda ǵylymı baıandama jasap, kórermenniń kemeńger tulǵa jaıyndaǵy bilimin baıytty.
Máýlit keshiniń taǵy bir taǵylymdy sharasy – dástúrli «Máýlit syılyǵyn» tabystaý rásimi boldy. Jyl saıyn dástúrli túrde ótkizilip kele jatqan Máýlit keshinde QMDB tóraǵasynyń birinshi orynbasary, naıb múftı, Nur-Sultan qalasynyń Bas ımamy Naýryzbaı qajy Taǵanulynyń bastamasymen birneshe jyldan beri arnaıy «Máýlit syılyǵy» tabystalyp keledi. Atalmysh syılyqtyń bıylǵy ıegerlerin anyqtaýǵa jaqynda ǵana ótken III Respýblıkalyq ımamdar forýmynda qabyldanǵan «Qazaqstan musylmandarynyń tuǵyrnamasy «Jeti rýhanı qazyq» qujatynda kórsetilgen jeti qasıet – negizgi ustanym boldy.
Berekeli kesh barysynda atalmysh qujatta kórsetilgen ımandylyq, otanshyldyq, aýyzbirshilik, bilimdilik, mádenıettilik, eńbekqorlyq, amanatshyldyq sekildi asyl qasıetter boılarynan kórinis tapqan abzal jandar búgingi keshtiń marapatyna ıe bolyp, halyq aldynda mereıleri asqaqtady.
Sýretterdi «FOTOGALEREIa» aıdarynan kóre alasyzdar!
