ELORDA MEShITTERINIŃ ShÁKIRTTERI ARASYNDA ZIIaTKERLIK BILIM SAIYSY ÓTTI (FOTO)
Búgin «Áziret Sultan» meshitinde QMDB Jastar isi sektory men Astana qalasy ókildiginiń uıymdastyrýymen Elorda meshitteriniń shákirtteri arasynda dinı taqyryptaǵy «DINTELLECT» zııatkerlik bilim saıysy ótti. Ár meshittiń bes shákirtinen jasaqtalǵan 14 komanda arasynda ótken bilim saıysyna Astana qalasynyń bas ımamy Erbolat Júsipov, QMDB Dinı ońaltý bóliminiń mamany Aqjigit Jarbol Bolatuly, Eýrazııa ulttyq ýnıversıtetiniń doktory, tarıhshy Alpysbaev Maqsatbek jáne «Ulan-ǵaıyr Dala Eli» QB dırektory Valıhan Bahretdınov myrzalar qazylyq jasap, úzdik topty anyqtaýǵa tyrysty.
QMDB Astana qalasynyń jáne «Áziret Sultan» meshitiniń Bas ımamy Erbolat Nuryldauly alǵy sóz sóılep, búgingi sharanyń mańyzdylyǵyn atap ótti. Sondaı-aq, Islamda bilimge erekshe nazar aýdarylatynyn aıtyp, jastarǵa óz nasıhatyn arnady.
«Quranda bilim jáne bilimdilerdiń artyqshylyǵy jóninde 375 aıat kelgen. Hasan ál-Basrı «Baqara» súresindegi «Ýa, Rabbymyz! Bizge bul dúnıede jaqsylyq ber jáne ahyrette jaqsylyq ber» degen aıatta bul dúnıedegi jaqsylyq bizge bilim jáne ǵıbadat, al ahyrettegi jaqsylyq jánnátqa kirgiz,- degen maǵynadaǵy duǵa deıdi. Eldiń, dinniń bolashaǵy úshin jastardyń bilimdi bolýy óte mańyzdy», - dedi ol óz sózinde.
QMDB Jastar isi sektorynyń meńgerýshisi Kópen Ádilet bilim saıysyn ózi júrgizip, oıyn erejeleri men baǵalaý jumystaryn tanystyryp otyrdy. 1-týr test formatynda ótse, 2-týr sózjumbaqtarmen jalǵasty. Al 3-týrdyń suraqtary foto, aýdıo, vıdeo túrinde berildi. 4-týr «Taqyryp ne?» dep ataldy. Bul týrda 5 suraq beriledi. 5 suraqtyń da jaýaby bir taqyrypqa qatysty. 5-týr logıkalyq suraqtarǵa arnalsa, 6-týrda kúrdelengen dinı suraqtar berildi. Sondaı-aq, Ramaazan aıyna oraı 7-Ekstratýr qosylyp, shákirtterdiń bilim taǵy bir qyrynan sarapqa salyndy.
Saıys nátıjesi boıynsha Respýblıkalyq Bas meshit shákirtteri 3-oryndy ıelense, «Ál-Fattah» meshitiniń shákirtteri azdaǵan basymdyqpen 2-orynǵa jaıǵasty. «DINTELLECT» zııatkerlik bilim saıysynyń bas júldesin «Áljan ana» meshitiniń shákirtteri qanjyǵasyna baılady. Jeńimpaz komandalardyń barlyǵyna qarjylaı syılyqtar berilip, arnaıy dıplommen marapattaldy. Sondaı-aq, bilim saıysyna qatysqan basqa komandalarǵa da yntalandyrý syılyǵy berildi.
Sýretterdi «FOTOGALEREIa» aıdarynan kóre alasyzdar!
