ELORDA MEShITTERINDE ZIRAT ÁDEBI MEN AS BERÝ MÁDENIETI TÚSINDIRILÝDE

Elorda meshitterinde «Din men dástúr» baǵyty aıasynda jamaǵatqa zırat ádebi, marqumdarǵa Quran baǵyshtaý, as berý mádenıeti jáne ysyrapshyldyqtyń aldyn alý jóninde nasıhat jumystary júrgizilýde.

Nasıhat barysynda din mamandary zııarat etýdiń maqsaty, marqumdarǵa duǵa etý, qabir basynda ádep saqtaý, marqumdarǵa qurmet kórsetý jáne orynsyz áreketterden aýlaq bolý jaıly aıtyp, kórkem nasıhat jasap keledi.

Sondaı-aq as berý kezinde artyq shyǵynǵa jol bermeý, ysyraptan saqtaný jáne dastarqandy ózgelermen básekelesý maqsatynda jaımaý kerektigin atap ótti. Óıtkeni as berýdiń máni dastarqannyń moldyǵymen emes, marqumǵa baǵyshtalǵan duǵa men jasalǵan izgi amaldar arqyly kórinis tabady.

Alla Taǵala Quran Kárimde: «Jeńder, ishińder, biraq ysyrap etpeńder. Óıtkeni Alla ysyrap etýshilerdi jaqsy kórmeıdi» («Aǵraf» súresi, 31-aıat), – dep eskertedi.

Imam, ustazdar mundaı máselelerde ulttyq dástúrdiń ozyq úlgilerin saqtaı otyryp, sharıǵat talaptaryn basshylyqqa alýdyń mańyzyn jetkizdi.

Aıta keteıik, elorda meshitterinde júrgizilip jatqan «Din men dástúr» baǵytyndaǵy nasıhat jumystary halyqtyń dinı saýatyn arttyrýǵa, ulttyq qundylyqtardy dáripteýge jáne qoǵamda ysyrapshyldyqtyń aldyn alýǵa baǵyttalǵan.

Источник: Aisha