Elorda meshitteri birkúndik jalaqylaryn Arys halqyna aýdardy (FOTO)
Tosynnan bolǵan apat tynyshtyǵynan aıyryp, tura kóshken Arys halqynyń aýyr jaǵdaıy búginde qazaq dalasynyń ár túkpirindegi jannyń qabyrǵasyna batyp turǵany anyq. Alystaǵy aǵaıynǵa qol ushyn sozyp, qaraılasýǵa talpynǵandardyń qatary da kún sanap kóbeıip keledi. Birliktiń bekem úlgisin tanytqan halyqtyń yqylasy men meıiri – bul aýyr shaqtyń da salmaǵyn azaıta túseri sózsiz.
Arystaǵy aǵaıynnyń aýyr hali belgili bolysymen elimizdiń túkpir-túkpirinde qaıyrymdylyq sharalary qolǵa alynyp, QMDB ókildikteri boıynsha gýmanıtarlyq kerýender uıymdastyryla bastaǵan bolatyn. Nur-Sultan qalasy ókildiginiń bastamasymen «Elorda asary» jarııalanyp, jamaǵat kómegin Arys halqyna jetkizý josparlanǵan bolatyn. Alla qalasa, apta sońynda Elorda halqynyń jylýy Arys jurtyna jetetin bolmaq.
Sondaı-aq, QMDB tóraǵasynyń birinshi orynbasary, naıb múftı, Nur-Sultan qalasynyń ókil ımamy Naýryzbaı qajy Taǵanulynyń bastamasymen Elorda meshitteriniń qyzmetkerleri birkúndik jalaqylaryn Arys halqyna aýdaryp otyr.
