Elorda ımamdaryna dinı ońaltý baǵyty boıynsha semınar ótti

Astana qalasyndaǵy «Áziret Sultan» meshitinde «Jat aǵym – joldan taıdyrady» taqyrybynda elorda ımamdaryna arnalǵan semınar uıymdastyryldy.

Jıynǵa QMDB-nyń Dinı ońaltý bóliminiń basshysy Danııar Kenjalın, Astana qalasy ókildigi boıynsha Dinı ońaltý baǵytyna jaýapty maman Raqymqazy Qabdysalym jáne elordanyń din qyzmetkerleri qatysty.

Semınar barysynda qoǵamdaǵy destrýktıvti dinı aǵymdardyń aldyn alý, dinı turaqtylyqty saqtaý jáne halyq arasynda dástúrli ıslam qundylyqtaryn keńinen nasıhattaý máseleleri talqylandy. Sondaı-aq jat ıdeologııalardyń belgileri, olardyń taralý joldary jáne olarǵa qarsy aqparattyq-túsindirý jumystaryn júrgizýdiń tıimdi tásilderi sóz boldy.

Jıynda sóz sóılegen Danııar Kenjalın din qyzmetkerleriniń jaýapkershiligine toqtalyp, jamaǵatpen jumys barysynda dinı saýattylyqty arttyrýdyń mańyzyn atap ótti. Sonymen qatar turǵyndardyń dinı suraqtaryna ǵylymı negizde jaýap berý, jastar arasynda túsindirý jumystaryn kúsheıtý jáne ońaltý baǵytyndaǵy tájirıbeler jóninde oı bólisti.

Kezdesý aıasynda qatysýshylar ózara pikir almasyp, tájirıbe bólisti. Semınar qorytyndysynda dinı turaqtylyqty nyǵaıtý jáne jat aǵymdardyń aldyn alý baǵytyndaǵy jumystardy júıeli túrde jalǵastyrý qajettigi atap ótildi.

Источник: Aisha