Elorda ımamdaryna áleýmettik jelini tıimdi qoldaný boıynsha semınar ótti
Qazaqstan musylmandary dinı basqarmasy Astana qalasy ókildiginiń uıymdastyrýymen «Áziret Sultan» meshitinde elorda ımamdaryna arnalǵan semınar ótti.
Semınar barysynda qazirgi qoǵamdaǵy ózekti máselelerdiń biri – áleýmettik jeliler arqyly taralatyn jat aǵymdardyń aldyn alý, dinı saýattylyqty arttyrý jáne halyqqa durys baǵyt-baǵdar berý máseleleri keńinen talqylandy.
Jıyn aıasynda áleýmettik jelini tıimdi qoldaný ádistemesine arnalǵan sheberlik sabaǵyn medıa mamany, Muslim.kz saıtynyń bas redaktory Erkin Shákiruly ótkizdi. Qatysýshylarǵa áleýmettik jeliniń qoǵam ómirindegi mańyzy jan-jaqty túsindirilip, onyń damý kezeńderi men búgingi qoldanys aıasy keńinen aıtyldy.
Sonymen qatar, jalǵan aqparattyń aldyn alý úshin málimettiń shynaıylyǵyn tekserý qajettigine nazar aýdaryldy. Áleýmettik jelini dinı-aǵartýshylyq baǵytta tıimdi paıdalaný, aýdıtorııamen baılanys ornatý jáne paıdaly kontent usyný joldary talqylandy. Sondaı-aq, jasandy ıntellekttiń múmkindikteri men ony jaýapkershilikpen qoldaný qajettigi aıtyldy.
