Elorda eriktileri qurbandyq etterin taratýǵa kiristi (FOTO)

Aıt merekesi esigimizden enisimen Elorda bazarlarynyń birinde bastalyp ketken qurban shalý rásiminiń kóp uzamaı-aq ekinshi kezeńi de bastaý aldy. Bul Alla razylyǵy úshin shalynǵan qurbandyq etterin muqtaj otbasylardyń qoldaryna tabystap, qasıetti Qurban aıt merekesimen quttyqtap shyǵý bolatyn. Qazaqstan musylmandary dinı basqarmasy uıymdastyrǵan Qurbandyq aktsııasy aıasynda soıylǵan mal etteri osylaısha birden tıisti mekenjaılaryna jetkizilip, ulyq merekeniń meıirin sezindirdi.

Qurbandyq etterin taratý jumystaryna Elorda meshitteriniń qyzmetkerleri men jamaǵatynan quralǵan jumys toby jáne Nur-Sultan qalasy ákimdiginiń uıytqy bolýymen qaladaǵy túrli eriktiler toby belsene atsalysyp, aıttyń alǵashqy kúni-aq qanshama otbasyǵa qýanysh syılady. Aıta keteıik, qurban shalý jáne taratý rásimderi erteń de jalǵasatyn bolmaq.

Sýretterdi «FOTOGALEREIa» aıdarynan kóre alasyzdar!