Elimizdiń Bas meshitinde Máýlit oqyldy (FOTO)

Búgin, qasıetti juma kúni Astana qalasyndaǵy respýblıkalyq «Áziret Sultan» meshitinde súıikti paıǵambarymyz (s.ǵ.s.) týylǵan Rabıǵ ál-áýýál aıynyń qurmetine oraı Máýlit merekesi  uıymdastyryldy. Jamaǵatqa esigin aıqara ashqan qulshylyq ordasyn búgin Paıǵambarymyzǵa degen saǵynyshtan týyndaǵan salaýat kernep, Máýlit merekesiniń mártebesi asqaqtaı tústi.

Aıtýly merekege aıryqsha daıyndalǵan meshit qyzmetkerleri juma namazyna jıylǵan jamaǵatqa erekshe syı-qurmet kórsetti. QMDB tóraǵasynyń birinshi orynbasary, naıb múftı, «Áziret Sultan» meshitiniń bas ımamy Naýryzbaı qajy Taǵanulynyń bastamasymen bıylǵy jyl tuńǵysh ret meshit jamaǵatyna Paıǵambarymyzdyń súıikti súnnetteriniń biri – mısk pen mısýak taratylyp, Paıǵambarymyzǵa (s.ǵ.s.) salaýat mátini jazylǵan paraqshalar úlestirildi. Aıta keteıik, elimizdiń Bas meshitinde buǵan deıingi Máýlit merekelerinde Alla Elshisiniń súıikti jemisi – qurma taratý dástúrli úrdiske aınalǵan bolatyn. Osylaısha, bıylǵy máýlit «Áziret Sultan» meshitiniń jamaǵaty úshin taǵy bir tyń jańalyǵymen erekshe este qalatyn boldy.

«Jánnatqa jeteleıtin jol» taqyrybynda aıtylǵan juma ýaǵyzynan soń «Áziret Sultan» meshitiniń bas ımamy Naýryzbaı qajy Taǵanuly ortaǵa shyǵyp, jamaǵatqa búgingi Máýlit merekesiniń mán-mańyzy jaıynda taǵylymdy nasıhat aıtyp, myńdaǵan júrekterde Paıǵambarymyzǵa (s.ǵ.s.) degen súıispenshilik sezimin oıatty. Eki dúnıe sardarynyń (s.ǵ.s.) árbir áreketi men sózinen rýhanı nár alyp, Muhammed (s.ǵ.s.) paıǵambarymyzdy shynaıy jaqsy kórýdiń qanshalyqty mańyzdy ekendigin de kórkem túrde jetkizdi.

Budan soń alyp meshit ishin lyq toltyrǵan jamaǵat Máýlit tyńdap, Paıǵambarymyzǵa (s.ǵ.s.) sansyz salaýattar joldandy. Qasıetti juma kúnine oraılastyrylǵan Máýlit merekesi osylaısha júrekterge ıman nuryn toltyryp, Súıikti Paıǵambarymyzǵa (s.ǵ.s.) degen saǵynysh sezimin eseledi.

Sýretterdi «FOTOGALEREIa» aıdarynan kóre alasyzdar!