Elimizdegi 2500 meshitte sybaılas jemqorlyqqa qarsy ýaǵyz aıtyldy
QR Memlekettik qyzmet isteri jáne sybaılas jemqorlyqqa qarsy is-qımyl agenttiginde «Sybaılas jemqorlyqsyz ónegeli urpaqty qalyptastyrýdaǵy rýhanııattyń róli» atty dóńgelek ústel ótti, dep habarlaıdy QazAqparat agentitktiń baspasóz qyzmetine silteme jasap.
Is-sharaǵa agenttik tóraǵasy Alık Shpekbaev, QR Aqparattyq jáne damý mınıstrliginiń din isteri komıteti tóraǵasynyń orynbasary Baýyrjan Bákirov, Qazaqstannyń Bas múftıi Oraz Serikbaı, Qazaqstandaǵy Evangelııa-lıýterandyq shirkeý basshysy, arhıepıskop Iýrıı Novgorodov, Astanadaǵy Áýlıe-Ýspenskıı kafedraldyq soborynyń protoıereıi Dmıtrıı Baıdek, frantsıskandyq ordender qaýymdastyǵynyń basshysy Mıhael Maıetıch, sondaı-aq óńirlik dinı birlestikterdiń ókilderi beınekonferentsbaılanys arqyly qatysty.
Jıyn barysynda Alık Shpekbaev sybaılas jemqorlyqqa qarsy tabysty saıasatty júrgizýde rýhanı mádenıettiń negizgi mańyzyn atap ótti. Ol sybaılas jemqorlyq barlyq álemdik dinder men rýhanı oı mektepterimen aıyptalatynyn, al bóten múlikti zańsyz ıemdený men paraqorlyq - kúná bolyp tabylatynyn atap ótti.
«Sizdiń árqaısyńyz dinı paryz turǵysynan ǵana emes, jalpy qabyldanǵan adam moraliniń normalary turǵysynan zańsyz áreketterge tyıym salýdy túsindire alasyzdar. Biz úshin sizdermen myqty azamattyq ustanymdy jáne sybaılas jemqorlyq kórinisterine tózbeýshilikti tárbıeleý máselelerinde ózara is - qımyldy nyǵaıtý óte mańyzdy», - dep atap ótti agenttik basshysy.
Jalpy ótken eki jylda 2,5 myń meshitte juma namazynyń aldynda «Paraqorlyq pen jemqorlyqtyń qasireti» ýaǵyzy oqylǵan. Agenttik dinı qyzmetkerlerdi sybaılas jemqorlyqqa qarsy bilimin jetildirip, daıyndaý maqsatynda 300-den astam semınar uıymdastyrdy. Búginde osy salanyń 15 000-nan astam ókilinde qajetti aqparat pen daǵdy bar. Sybaılas jemqorlyqqa qarsy mádenıetti qalyptastyrý salasynda qabyldanyp jatqan sharalar týraly áńgimelegen agenttik tóraǵasynyń orynbasary Oljas Bektenov óskeleń urpaq elimizdiń mektepke deıingi mekemelerinde, mektepterinde, kolledjder men joǵary oqý oryndarynda sybaılas jemqorlyqqa qarsy tárbıemen jáne oqytýmen qamtylǵanyn atap ótti.
«Adamdardyń sybaılas jemqorlyqtan sanaly túrde alshaq júrýi mańyzdy. Mundaı senim adamnyń adamgershilik jáne rýhanı damýy arqyly bolýy múmkin, - dep atap ótti Oljas Bektenov - meshit, shirkeý, ǵıbadathana, sınagoga jáne basqa da dinı ǵımarattar - adamgershilikke baýlıtyn tárbıe ortalyqtary. Dinı rásimderdi, ýaǵyzdardy oryndaý kezinde sybaılas jemqorlyqtyń kúná ekendigi týraly únemi túsindirýdi tájirıbege engizýdi ótinemiz»,- dedi ol din ókilderine.
Oljas Bektenovtyń aıtýynsha, Qazaqstanda 15 dinı bilim berý uıymy, meshitter men jeksenbilik mektepter janynda 400 bastaýysh kýrs, dinı ǵımarattardan tys jerlerde dinı is-sharalardy ótkizýge arnalǵan 383 úı-jaı, dinı ádebıetter men dinı mazmundaǵy ózge de aqparattyq materıaldardy, dinı maqsattaǵy zattardy taratýǵa arnalǵan 257 arnaıy turaqty úı-jaı jumys isteıdi. Halyqtyń irgeli qundylyqtaryn nyǵaıtý maqsatynda agenttik dinı qyzmetshilerdi daıarlaýdyń kásiptik oqý baǵdarlamalaryn iske asyratyn osy rýhanı jáne dinı bilim berý uıymdarynyń qabyrǵalarynda sybaılas jemqorlyqqa qarsy aǵartý máselelerine nazar aýdarýdy usyndy.
Kún tártibindegi keń aýqymdy máselelerdi talqylaı otyryp, is-sharaǵa qatysýshylar sybaılas jemqorlyqqa qarsy aǵartý máseleleri boıynsha birlesken kúsh-jigermen júzege asyrylatyn birqatar usynystar men usynymdardy aıtty. Shara sońynda qatysýshylar seriktestik prıntsıpi boıynsha ózara is-áreket jasaýǵa kelisti.
