Elimizde Islam Entsıklopedııasy jaryq kóredi (FOTO)

Elimizde Bas múftı Naýryzbaı qajy Taǵanulynyń jetekshiligimen Islam Entsıklopedııasy jaryq kóredi. Bul týraly Óskemende ótip jatqan QMDB Ǵulamalar keńesiniń HHH májilisinde málim boldy.

Keńes jumysyna qatysqan belgili ǵalym, M.Áýezov atyndaǵy Ádebıet jáne óner ınstıtýty Ejelgi dáýir ádebıeti jáne túrkologııa bóliminiń meńgerýshisi, fılologııa ǵylymynyń kandıdaty, dotsent Tóráli Qydyr Islam Entsıklopedııasynyń mazmuny men tujyrymdamasy jaıly baıandap ótti.
«Entsıklopedııa álippelik kórsetkish boıynsha ázirlenedi. Birinshi tomǵa Islam týraly maqala engiziledi. Ár tomǵa 3500-ge jýyq sózdik enedi. Eńbekke tulǵalar men jaǵrafııalyq málimetterdiń sýreti qosa beriledi. Ár tom 560-640 betten turady. Jınaqtalǵan málimetterge qaraı Islam Entsıklopedııasy 4-5 tom bolady» dep atap ótti Tóráli Qydyr.

Májiliste ǵulamalar tarapynan qundy eńbekke qatysty usynystar men pikirler aıtyldy. Bas múftı Naýryzbaı qajy Taǵanuly Islam Entsıklopedııasyn sapaly shyǵarý úshin mańyzdy málimetterdi jınaqtaý qajettigin aıryqsha atap ótti.

Aıta ketsek, Islam Entsıklopedııasyn shyǵarý jumysyna Shámshıdın Kerim, Muhan Isahan syndy ǵalymdar úles qospaq. Bas múftı musylman jamaǵaty úshin mańyzdy bolatyn eńbektiń birinshi tomyn múmkindiginshe jýyq arada jazyp shyǵýdy tapsyrdy.