Dinı basqarma delegatsııasy Kaırde tarıhı meshitterdi aralady (FOTO)

Bas múftı Naýryzbaı qajy Taǵanuly bastaǵan Qazaqstan musylmandary dinı basqarmasy delegatsııasy Mysyr Arab Respýblıkasynyń astanasy Kaır qalasynda ornalasqan Sultan Beıbarys, Qalaýyn Sultan syndy tarıhı meshitterdi aralady. Meshit qyzmetkeri delegatsııa múshelerine kóne tarıhtan syr shertetin ǵımarattar jaıly jan-jaqty málimet berdi.

Mysyrdaǵy Mámlúk elin qurǵan yqpaldy tulǵalardyń arasynda Aıbek, Qutyz, Baıbaryspen birge Qalaýyn aty jıi atalady.

Sultan Qalaýyn Islam órkenıeti men Mysyrdyń damýyna úlken úles qosty. Ol Kaırde záýlim medrese saldyrdy. Buryn-sońdy bolmaǵan Kaır aýrýhanasyn turǵyzdy. Sultan Qalaýyn meshiti eń kóne ǵımarattyń biri sanalady. Meshitte ystyq aýany salqyn aýamen almastyratyn ózdiginen jumys isteıtin tabıǵı jeldetkish júıesi bar. Al minberdegi ımam daýysy ózdiginen tabıǵı túrde ulǵaıady. Qurylys pen sáýlet óneriniń ozyq úlgileri kórinis tapqan meshitke kelýshiler sany jyl saıyn artyp keledi.

Aıta keterligi, meshit qabyrǵalary men esik jaqtaýlarynda halqymyzdyń qoshqar múıizdi oıýy beınelengen.