Dinı basqarma bir aptada 5 957 otbasyǵa kómek kórsetti (FOTO)

Qazaqstan musylmandary dinı basqarmasy bir apta ishinde 5 957 otbasyǵa kómek kórsetti.Bas múftı Naýryzbaı qajy Taǵanuly elordada qaıyrymdylyq sharasyn ózi bastap, kómekke muqtaj otbasylarǵa azyq-túlik taratyp, olarǵa nasıhatyn jetkizgen bolatyn.

«Halqymyzda «Qaıyrymdylyq jasasań – qaıyryn óziń kóresiń» degen naqyl sóz bar. Dinı basqarmanyń negizgi jumys baǵyttarynyń biri – qaıyrymdylyq. Men jurtymyzǵa joldaǵan Úndeýimde karantın kezinde úmitsizdikke boı aldyrmaı, saýapty amaldar men qaıyrymdylyq sharalarǵa úles qosýǵa shaqyrdym. Biz qashan da ózgelerge qaıyrymdylyq jasap, jan-jaǵymyzǵa shýaǵymyzdy tógip, sharapatymyzdy tıgizip, adamnyń alǵysyn alyp ósip-óngen elmiz. Syndarly sátte bir-birimizge jyly sóz aıtyp, jabyqqan jandarǵa kómektesýdiń saýaby mol. Osynaý saýapty iske úles qosqan barsha din qyzmetkerleri men demeýshi azamattarǵa rııasyz rızashylyǵymdy bildiremin», – deıdi Bas múftı Naýryzbaı qajy Taǵanuly.

Aıta ketsek, qaıyrymdylyq aktsııasy respýblıka deńgeıinde júzege asqan. Azyq-túlik pen turmystyq zattarǵa ketken qarajat mólsheri – 25 015 950 teńge. Bul bastama jalǵasyn taba bermek.