DINI BASQARMA ALMATYDA AÝYZAShAR BERDI (FOTO)
Qazaqstan musylmandary dinı basqarmasynyń uıymdastyrýymen Almatyda zııaly qaýym, buqaralyq aqparat quraldary, túrli salanyń tanymal ókilderine, sonymen qatar, Ardagerler úıindegi qarııalarǵa aýyzashar berildi.
«Ramazan – birlik pen bereke aıy» ataýymen ótken rýhanı keshte QMDB Tóraǵasy, Bas múftı Naýryzbaı qajy Taǵanuly aýyzashar dastarqanynyń qadirli qonaqtaryna nasıhat aıtty.
«Ramazan – on eki aıdyń sultany, berekeli de keshirimi mol aı. Kúndelikti tirshilik qamymen júretin pendeniń júregine bul aıda ıman nury quıylady. Óıtkeni oraza adamdy taqýalyqqa tárbıeleıdi. Sabyrlyq, qaıyrymdylyq, meıirimdilik, baýyrmaldyq sekildi adamdyq asyl qasıetter artyp, ıman kúsheıedi. Ramazan – Allanyń meıirimi tógilip, jumaqtyń esigi aıqara ashylatyn, ımandy kúsheıtýge múmkindik berilgen qasıetti aı. Oraza – kúndiz tek iship-jeýden ózin shekteý degen sóz emes. Oraza – rýhtyń azyǵy, tánniń shıpasy. Ramazan jan men tándi rýhanı tazartatyn, musylman úshin úlken sabyr mektebi» dedi Bas múftı.
Igi basqosýda jarapazan jyry aıtylyp, Bas múftı respýblıka boıynsha aıtylǵan jarapazan jyrynyń qorytyndy batasyn jasady. Aýyzasharda belgili jazýshy Smaǵul Elýbaı, Jazýshylar odaǵynyń tóraǵasy Mereke Qulkenov jamaǵatqa ıgi tilegin jetkizdi.
Kesh sońynda qasıetti Quran aıattary oqylyp, Bas múftı arnaıy duǵa jasady. Sondaı-aq aýyzashar qonaqtaryna Ramazan syılyǵy tabys etildi.
