Nur-Múbarak ýnıversıtetiniń stýdentteri arasynda jarys ótti

Nur-Múbarak ýnıversıteti stýdentterine negizgi dáristerden ózge qosymsha sabaqtar júıeli túrde uıymdastyrylady. Sonyń biri – arab tili dárisi. Sebebi arab tili – álemde qoldanylý jaǵynan besinshi oryndy enshilegen ári Quran tili.

Ýnıversıtettiń Tárbıe isteri jáne áleýmettik damý bóliminiń uıytqy bolýymen qolǵa alynǵan arab tiliniń qosymsha kýrstary nátıje bere bastady. Oqý jylynyń basynda 1-kýrs stýdentterine «Tákállým» kitabynyń «Ásásı» deńgeıin oqytý dárisi márege jetip, atalǵan kitapty oqyp taýysqan shákirtter arasynda arnaıy synaq ótti.

Emtıhandy Arab tili men ádebıeti kafedrasynyń meńgerýshisi, PhD doktory Baǵdat Mahanuly men Arab tili men ádebıeti kafedrasynyń aǵa oqytýshysy, doktorant Qýanysh Qasymbaev ustazdar qabyldady. Synaq tapsyrǵan 34 shákirt te daıyndyǵy joǵary ekenin kórsetti. Saıys nátıjesinde bilim saıysynda qatarynan oq boıy ozyq bolǵan Baýyrjan Jumaǵalıev 1-oryndy ıelendi. 2-oryn Álisher Qabyldanyń, 3-oryn Qadyr Ilııastyń enshisine buıyrdy.

Uıymdastyrýshylar arab tilin jetildirýge baǵyttalǵan bul oqý kýrsy aldaǵy ýaqytta arab tiliniń morfologııa, sıntaksısin úıretýge den qoıatynyn jetkizdi. Shákirtter de bolashaqta jeńis tuǵyrynan kórinýge talpynatynyn baıqatty.