ChIKAGODAǴY QAZAQ DIASPORASYMEN RÝHANI KEZDESÝ ÓTTI

AQSh-qa jasalǵan jumys sapary aıasynda Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly bastaǵan QMDB delegatsııasy Chıkago qalasyndaǵy qazaq dıasporasy ókilderi jáne stýdenttermen rýhanı kezdesý ótkizdi.

Kezdesýge QMDB Apparat jetekshisi Ǵylymbek Májıev, Ýaǵyz-nasıhat bóliminiń meńgerýshisi Batyrjan Mansurov jáne QMDB Ǵulamalar keńesiniń múshesi, RANT múshesi Arman Qýanyshbaev qatysty.

Bas múftı óz sózinde:
«Otbasy qundylyǵy – ulttyń tiregi. Qasıetti Quranda erli-zaıyptylardyń bir-birine “kıim” ispetti ekeni aıtylǵan. Bul – jubaılar bir-birine qorǵan, tirek, kórik bolýy kerek degen úlken taǵylym. Otbasynda meıirim, sabyr, keshirim jáne ózara túsinistik bolǵan jerde bereke ornaıdy. Salıqaly urpaq tárbıeleý – ata-ananyń eń úlken amanaty ári jaýapkershiligi», – dedi.

Nasıhat barysynda otbasylyq baqytqa jetkizetin mańyzdy qundylyqtar – ózara jaqsy mámile, keshirimdilik, otbasy múshelerine jyly kóńil-kúı syılaý, syılastyq pen jyly sóz, sondaı-aq izgi urpaq tárbıesi keńinen túsindirildi.

Kezdesý barysynda otandastar kókeıdegi saýaldaryn qoıyp, erkin formatta pikir almasty.

Kezdesý sońynda Chıkago qalasyndaǵy otandastar úshin Múftııat baspasynan jaryq kórgen rýhanı-tanymdyq kitaptar jergilikti qazaq qaýymy ókilderine tabystaldy.





































​