BUU Astana protsesine joǵary baǵa berdi

Astana protsesi alǵash ret BUU Qaýipsizdik keńesiniń qararynda ataldy. Osylaısha álemde beıbitshilik pen turaqtylyqty qamtamasyz etetin bas organ Qazaqstannyń Sırııa shıelenisin retteýge qosqan eńbegine joǵary baǵa berdi, dep habarlaıdy «Habar 24».

Qarar mátininde kelissózderdiń astanalyq formaty tutqynǵa túsken adamdardyń, ásirese áıelder men balalardyń tezirek bosatylýyna, sondaı-aq qaza bolǵandar men iz-túzsiz joǵalyp ketken adamdardy anyqtaýǵa eleýli úles qosyp júrgeni aıtylǵan. Qujatty daıyndaýǵa qazaqastandyq dıplomattar da qatysqan. Arasynda Taıaý Shyǵys máseleleri jónindegi sarapshy Dáýlet Emberdıev bar.

«Elbasy tapsyrmasymen Astana protsesimen aınalystyq. Is júzinde ol Sırııadaǵy beıbitshilikke jetýdiń jalǵyz tıimdi quraly retinde qalyp otyr. Qazaqstandyq dıplomatııa, qazaq janynyń nıeti sekildi adal ári meıirimdi. Únemi beıbitshilikke shaqyryp, taraptardy bitistiretin bastamalar usynyp, júıeli saıasat ustandyq. BUU Qaýipsizdik keńesinde halqymyzdyń beıbit saıasatyn pash etkenimizdi maqtan tutýǵa bolady dep sanaımyn. Tabysqa jetip, óz mindetimizdi oryndadyq», – deıdi Taıaý Shyǵys máseleleri jónindegi sarapshy, Dáýlet Emberdıev.