Búgin – QMDB qurylǵan kún
2020 jyldyń 12 qańtary – Qazaqstan musylmandary dinı basqarmasynyń qurylǵanyna 30 jyl.
QMDB osydan týra 30 jyl buryn irgetasy 1943 jyly Ózbekstan astanasy Tashkentte qalanǵan Orta Azııa jáne Qazaqstan musylmandary dinı basqarmasynan bólinip, derbes dinı basqarma bolyp quryldy. Osy kúni Qazaqstan musylmandarynyń tuńǵysh quryltaıy ótip, Bas múftı qyzmetine Rátbek qajy Nysanbaıuly saılandy. Tuńǵysh múftı Rátbek qajy Nysanbaıuly aqsaqaldyń kezindegi ýaqytty «alǵashqy saýat ashý kezeńi» deýge bolady.
2000 jyly ótken III quryltaıda Bas múftı bolyp professor Ábsattar qajy Derbisáli saılandy. Ǵylymı saladan dinı qyzmetke aýysqan Ábsattar qajy Derbisáli Bas múftı bolǵan jyldar «aǵartý kezeńi» boldy. 2013 jyldyń 19 aqpanynda Qazaqstan musylmandarynyń kezekten tys ótken VII quryltaıynda Erjan qajy Malǵajyuly Bas múftı bolyp saılandy. Erjan qajy Malǵajyuly Bas múftı bolǵan jyldary múftııat «órleý kezeńine» qadam basty.
2017 jyldyń 8 jeltoqsanynda ótken Qazaqstan musylmandarynyń kezekti VIII quryltaıynda Serikbaı qajy Oraz Bas múftı bolyp saılandy. QMDB tizginin qolǵa alǵan Serikbaı qajy Orazdyń búgingi kezeńi jańa zamandaǵy "jaýapty kezeń".
QMDB Bas múftı, Naıb múftı, Bas múftı keńesshisi, QMDB Ǵulamalar Keńesi, Qamqorlar keńesi, QMDB Tóralqasy, Apparat jetekshisi, Dinı ister jáne taldaý, Sharıǵat jáne pátýa, Meshit isteri, Is basqarýshysy, Halyqaralyq qatynas jáne protokol, Qajylyq, Nasıhat jáne qoǵammen baılanys, Dinı bilim jáne kadr daıarlaý, Halal ónimderin standarttaý, Baspasóz, Ýaqyp jáne qaıyrymdylyq bólimderi men Ǵalamtormen jumys, Áıel-qyzdar, Jastar syndy sektordan quralǵan.
QMDB el turǵyndaryna Islam dininiń hanafı mázhabyn nasıhattap, qaıyrymdylyq is-sharalaryn uıymdastyryp, bilimdi mamandar daıyndap jáne jat aǵymdarmen kúres jumystaryn júıeli túrde júrgizip keledi. Sonymen qatar, QMDB dinı ádebıetterdi daıyndaý jáne saraptamadan ótkizý syndy jumystardy atqarsa, 2019 jyldyń qazan aıynan bastap «Munara» gazeti qalyń oqyrmanǵa jol tartty.
Qurylǵanyna shırek ǵasyrdan asqan múftııat 30 jyldyq belesti baǵyndyryp, el musylmandarynyń qarashańyraǵyna aınaldy. Osynaý mereıtoı aıasynda QMDB 30 meshitke el ıgiligi jolynda qyzmet etken tulǵalardyń esimin berýdi, 30 eldimekenniń aýyzsý, jol-kópir máselesine oń yqpal etýdi, 30 otbasyǵa qaıyrymdylyq jasaýdy, 30 stýdentke grant taǵaıyndaýdy, 30 meshitke kúrdeli jóndeý júrgizýdi, t.b. ıgi is-sharany qolǵa alǵaly otyr.
