Birlikpen bul synaqty da eńseremiz
Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn!
Qadirli qaýym!
Barshańyzdy qasıetti Ramazan aıymen tuspa-tus kelgen, mamyrajaı mamyrdyń alǵashqy kúninde atap ótetin birlik merekesimen quttyqtaımyn! Ár otbasyna, elimizdiń ár azamatyna baqyt pen bereke, tatýlyq pen birlik tileımin. Jaratqan otbasymyzǵa jar bolǵaı! Ámın!
Allanyń qalaýymen bıyl orazany oqshaýlaný jaǵdaıynda qarsy alyp, birlik merekesin úıde atap ótýge týra keldi. Elimizde tótenshe jaǵdaıdyń jarııalanýy – asa qajetti ýaqytta qabyldanǵan sheshim. Bul halyqtyń densaýlyǵy men ómirin saqtaý jolyndaǵy ıgi qadam der edik. Endigi maqsat – birligimizdi tanytyp, karantın talaptaryn saqtap, juqpaly dertpen jumyla kúresý.
Qoǵamnyń damý jolynda halyqtyń birligi qashan da qymbat qundylyq bolǵan. Álemdi jaılaǵan búgingi syndarly sátte onyń mańyzdylyǵy odan saıyn arta túsýde. Birliktiń arqasynda juqpaly dertti joıǵan eldi kórip otyrmyz.
Islam dini barsha ultty tatýlyqta, ózara qurmet pen kelisim aıasynda ómir súrýge úndeıdi. Jaratýshy Jabbar Iemiz qasıetti Quranda adamzat balasyna: «Allanyń jibinen myqtap ustańdar, ajyrap bólinbeńder» («Álı-Imran» súresi, 103-aıat), – dep buıyrǵan. Dana halqymyz «Yrys aldy – yntymaq» deıdi. Birligi bekem elge bereke ornaıdy. Jaratqannyń járdemimen yntymaqtyń arqasynda osy synaqty de eńseremiz degen úmittemiz.
Qurmetti otandastar!
1 mamyr – birlik merekesi qutty bolsyn! Sizderge Alladan amandyq, qut pen bereke tileımin.
Jaratqan Jabbar Iemiz jer betinde juqpaly indetti joıyp, barshamyzdy qýanyshty sátte qaýyshýdy násip etkeı! Elimiz aman, jurtymyz tynysh bolǵaı! Ámın!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı
