Birinshi naıb múftı «Jeti rýhanı qazyq» qujatyn tanystyrdy (FOTO)
Qazaqstan musylmandary dinı basqarmasynyń uıymdastyrýymen Elorda tórinde ótip jatqan «Rýhanı qundylyqtar – qoǵam birliginiń negizi» atty III Respýblıkalyq ımamdar forýmynda birqatar mańyzdy qujattar qabyldandy. Atap aıtqanda, aıtýly jıyn barysynda «Jeti rýhanı qazyq» Qazaqstan musylmandarynyń Rýhanı tuǵyrnamasy, «QMDB atqaratyn dinı rásimder tizilimi» jáne «QMDB qurylymyndaǵy dinı laýazymdar tizilimi» atty qujattar tanystyrylyp, qatysýshylardyń qyzý qoldaýyna ıe boldy.
El tutastyǵy men turaqtylyqty nyǵaıtyp, elimizdegi ár azamattyń bilim alyp, qoǵamǵa paıdaly bolýǵa, otansúıgishtikke, izgilikke, birlikke, meıirimdilikke, eńbekqorlyqqa, t.b. adamgershilik qundylyqtarǵa úndegen III Respýblıkalyq ımamdar forýmynyń alǵashqy qujaty da halqymyzdyń rýhanı qundylyqtaryn nasıhattaýǵa, musylman jamaǵatyn jaqsylyqqa úndeýge arnaldy. QMDB tóraǵasynyń birinshi orynbasary, Nur-Sultan qalasynyń bas ımamy Naýryzbaı qajy Taǵanuly qatysýshylarǵa forýmnyń basty qujaty – «Jeti rýhanı qazyq» Qazaqstan musylmandarynyń rýhanı tuǵyrnamasyn tanystyryp, qazirgi qoǵam múshelerine eń qajetti jeti qasıet jaıynda baıandap berdi.
«Tuǵyrnama musylmannyń tulaboıynda tabylýy tıis negizgi jeti kórkem sıpatty qamtıdy. Atap aıtqanda, ımandylyq, otanshyl bolý, bilim alý, birlikke bolysý, eńbekqorlyq, mádenıetti bolý jáne ádildik prıntsıpin ustaný. Bul – adam balasynyń kisilik kelbetin, kórkem minezin qalyptastyrýǵa negiz bolatyn jeti rýhanı qazyq», – dep atap ótti Naýryzbaı qajy Taǵanuly.
