Birinshi naıb múftı ońaltý ortalyǵyndaǵy tusaýkeser rásimine qatysty (FOTO)

«BI-Juldyzaı» korporatıvtik qaıyrymdylyq qorynyń qoldaýymen iske qosylǵan Astana qalasyndaǵy «Juldyzaı» medıtsınalyq ońaltý ortalyǵy sal aýrýyna saldyqqan sábılerdi saýyqtyryp, búldirshinderdiń bolashaǵy jolynda jemisti eńbek etip kele jatqanyna talaı jyldyń júzi boldy. Osy ýaqyt ishinde ortalyqqa kelgen myńdaǵan naýqas balalardyń baqyty úshin talmaı eńbek etken qyzmetkerlerdiń em sharalary arqasynda dert meńdegen talaı búldirshin aıaǵynan turyp ketken.

Osy oraıda, ońaltý ortalyǵynyń qyzmetkerleriniń uıymdastyrýymen sońǵy tórt jyl ishinde turaqty túrde tusaýkeser rásimi ótkizilip, táı-táılaǵan balalar baqyty úshin arnaıy merekelik shara úzbeı jasalyp keledi. Qarasha aıynyń 17-juldyzy kúni Ońaltý ortalyǵynda em qabyldaǵan taǵy birneshe sábıdiń tusaýy kesilip, alǵashqy qadamdary kópshilik batasymen nurlandy.

Igi sharaǵa QMDB tóraǵasynyń birinshi orynbasary Naýryzbaı qajy Taǵanuly ózi qatysyp, búldirshinderge shıpa tilep, aq batasyn arnady. «BI-Juldyzaı» korporatıvtik qaıyrymdylyq qorynyń buǵan deıin de birneshe márte uıymdastyrǵan tusaýkeser rásimderine qalmaı qatysyp, janashyrlyq kórsetip kele jatqan Astana shaharynyń bas ımamy bul joly da jıylǵan qaýymdy búgingi qýanyshymen quttyqtap, rýhanı qoldaý tanytty. Ár qıyndyqtyń artynan bir jeńildik bolatynyn jetkizip, sabyrlyq etýdiń mańyzyn túsindirgen Naýryzbaı Taǵanuly arnaıy duǵa jasap, Alla Taǵaladan naýqas sábılerge shıpa surady.

Sýretterdi «FOTOGALEREIa» aıdarynan kóre alasyzdar!