Birinshi naıb múftı Arys halqynyń jaǵdaıymen tanysty (FOTO)

Búgin QMDB tóraǵasynyń birinshi orynbasary, naıb múftı Naýryzbaı qajy Taǵanuly Arys qalasyna arnaıy keldi. Aldymen jarylystan zardap shekken meshitterdiń jaı-kúıimen tanysty. Epıtsentr mańaıyndaǵy turǵyndardyń hal-jaıyn surasty.

Sondaı-aq, osy kúni QMDB men aımaqtyq ókildikteriniń uıytqy bolýymen jurtshylyqtyń jıyp-terip, tıep jibergen bes kerýeni Arysqa jetti. Nur-Sultan, Almaty, Shymkent qalalary men Mańǵystaý, Atyraý oblystarynyń azyq-túlik, kerek-jaraqtary Arys qalasynyń qabyldaý bazasyna túsirildi. Barlyq amanat Naýryzbaı Taǵanulynyń baqylaýymen jaýapty mamandarǵa tabystaldy. Arystyqtar alǵystaryn bildirýde.

Tóraǵa orynbasary «Bekzat ata»  meshitinde jergilikti meshit qyzmetkerlerimen kishigirim keńes ótkizdi. Besin namazyn jamaǵatpen birge oqyp, sabyrlyqtyń saýaby jaıly nasıhat aıtty. Apattan zardap shekken ımamdardyń otbasylaryn zııarat etti.

​