Beıbit Myrzageldıev Jambyl oblysynyń bas ımamy bolyp taǵaıyndaldy

QMDB Tóraǵasy, Bas múftı Naýryzbaı qajy Taǵanulynyń buıryǵymen Jambyl oblysynyń bas ımamy qyzmetine buǵan deıin QMDB Dinı bilim jəne kadr daıarlaý bóliminiń meńgerýshisi qyzmetin atqarǵan Beıbit Myrzageldıev taǵaıyndaldy.

Elordadan arnaıy kelgen QMDB Qaıyrymdylyq jáne ýahyp isteri bóliminiń meńgerýshisi Qamaljan Bekbosynuly Jambyl oblysynyń jańa bas ımamyn tanystyryp, aldaǵy atqarar qyzmetine sáttilik tiledi. Meshit qyzmetkerleri qatysqan jıynda Qamaljan Bekbosynuly Qanat Jumaǵuldyń bas ımam qyzmetin úlken abyroımen atqarǵanyn atap ótti.

«Qanat Ádilhanuly Jambyl oblysynyń ókildigin basqarǵan ýaqytta oblystyń dinı ahýalyn kóterýge eren eńbek sińirip, Jambyl oblysyn dinı qyzmeti jóninen respýblıka boıynsha 3-orynǵa kóterdi. Din mamany bolý mol jaýapkershilikti talap etedi. Elimizdiń ár óńirindegi dinı ahýaldy retteý úshin ımamdardyń bir jerden ekinshi bir orynǵa qyzmet aýystyrýy qalypty jaǵdaı», - dep atap ótti.

Qanat Ádilhanuly «Hıbatýlla Tarazı» medresesiniń dırektory qyzmetin saqtaı otyryp Taraz qalasyndaǵy «Ar Rahman, Ar Rahım» meshitine bas ımam bolyp taǵaıyndaldy. Jambyl oblysynyń jańa bas ımamy Beıbit Álipbekuly «Hıbatýlla Tarazı» medresesiniń dırektory Qanat Jumaǵulmen birlese qyzmet atqaryp, aımaqtaǵy dinı bilimdi joǵary deńgeıge kóterýge kúsh salatynyn atap ótti.

BEIBIT ÁLIPBEKULY MYRZAGELDIEV

1980 jyly 14 shildede Ońtústik Qazaqstan oblysynda dúnıege kelgen. 1996 jyly Ózbekstannyń Ándıjan qalasynda quran jattaý ortalyǵyn bitirdi. 1998-2003 jyldary Shymkent qalasyndaǵy M.Áýezov atyndaǵy memlekettik ýnıversıtetiniń tarıh fakýltetin tarıhshy mamandyǵy boıynsha bitirdi. 2007 jyly Pákistandaǵy Daýa Akademııasynyń tyńdaýshysy boldy. 2010 jyly L.N.Gýmılev atyndaǵy Eýrazııa ulttyq ýnıversıtetiniń fılosofııa fakýlteti dintaný mamandyǵy boıynsha magıstri biliktiligin aldy. 2017 jyldan bastap Nur-Múbarak Egıpet ıslam mádenıeti ýnıversıtetiniń doktaranty.

Eńbek joly:

2002-2005 jyldary Shymkent qalasy Telman eldimekenindegi «Tólenbaı» meshitiniń bas ımamy qyzmetin atqardy.
2005-2010 jyldary Astana qalasy «Nur-Astana» ortalyq meshitiniń naıb ımamy jáne 2007 jyldan bastap «Astana medresesi» dinı birlestigi dırektorynyń orynbasary qyzmetin qosa atqardy.
2010-2014 jyldary OQO-nyń ókil ımamy, Shymkent qalasyndaǵy «A.Qattanı» meshitiniń bas ımamy jáne «Shymkent» medresesiniń dırektory qyzmetin atqardy.
2014-2019 jyldary QMDB Qajylyq jáne halal ónimderin standarttaý bóliminiń meńgerýshisi bolyp qyzmet atqardy.
2019-2020 jyldary QMDB Dinı bilim jáne kadr daıyndaý bóliminiń meńgerýshisi qyzmetin atqardy.