Berdibek Saparbaev: Imandylyqsyz, turaqtylyqsyz qoǵam damymaıdy (FOTO)

Elorda tórinde ótip jatqan «Rýhanı qundylyqtar – qoǵam birliginiń negizi» atty III Respýblıkalyq ımamdar forýmynda sóz alǵan QR Premer-mınıstr orynbasary qoǵamda turaqtylyq pen ımandylyq bolmasa ol elde damý bolmaıtynyn atap ótti.

«Qaı qoǵamda bolmasyn turaqtylyq, birlik, ımandylyq bolmasa ol jerde eshqandaı damý bolmaıdy. Sondyqtan Qazaqstan musylmandary dinı basqarmasynyń ımamdardyń basyn jıyp, rýhanı qundylyqtar týraly máseleni talqylaýy – óte oryndy bastama. Bul bastamalaryńyzǵa sáttilik, jemis tileımin.

Rasynda, qoǵamda din qyzmetkeriniń orny erekshe. Sizder adam balasy dúnıe esigin ashqan sátten bastap, dúnıe salǵan sátke deıin dinı rásimderdi atqaryp beresizder», – dep tilegin jetkizdi Berdibek Mashbekuly.