Bekzat Sattarhanov týraly kórkem fılm úlken Ekranǵa jol tartty (FOTO)
Keshe, 3 shilde kúni elordada «Habar» agenttiginiń tapsyrysymen túsirilgen «Bekzat» kórkem fılminiń jabyq kórsetilimi ótti. Kartına Sıdneı Olımpıadasynyń chempıony marqum Bekzat Sattarhanovtyń ómiri men sporttaǵy jetistigi týraly sýretteıdi,
Sharaǵa QR Aqparat jáne qoǵamdyq damý mınıstri Dáýren Abaev, QR Mádenıet jáne sport mınıstri Aqtoty Raıymqulova, jýrnalıster men blogerler, sportshylar men óner ıeleri, sondaı-aq akterler quramy qatysty. Bekzat Sattarhanovtyń ata-anasy bul kórsetilimge arnaıy Túrkistannan keldi.
«20 jas ǵumyrynda qolynan kelgenshe eline barlyq kúsh-jigerin berip ketti. Bekzatqa qandaı marapat, qandaı kıno shyǵarsa da artyq bolmas. Bekzatty jastardyń aldyna úlgi etip qoısa... onyń ımandylyǵy, úlkendi syılaýy, qazaqylyǵy, birbettiligi, alǵa qoıǵan maqsatyn oryndaıtyn minezi qazirgi qazaq jastaryna kerek» - deıdi Bekzat Sattarhanovtyń ákesi Seıilhan Sattarhanov.
Kartınanyń rejısseri - Murat Bıdosov, stsenarııin Serjan Zakeruly jazǵan.
Fılmniń sıýjettik jelisinde Bekzat Sattarhanov ómiriniń úsh kezeńi qamtylady. Balalyq shaǵy, boz bala kezeńi jáne ómiriniń sońǵy sáti. 90 jyldardyń basyndaǵy qıyn-qystaý zamanǵa tap kelgen Bekzattyń balalyǵy kóp qıyndyqtarmen ótedi. Túrkistan qalasyndaǵy temir joldy boılaı ornalasqan shaǵyn aýyldyń qarapaıym tirshiligi bala Bekzattyń kózimen beınelenedi. Onyń armany, namysqoı bitimi ár bir sátte synalyp otyrady.
Birde ata-anasy Bekzatty kúreske qatyssyn dep bapkerge aparady. Onda Bekzat óziniń sergektigimen kózge túsedi. Degenmen kúreske qatysqan balanyń boıy óspeı qalady degen túsinikpen ony boksqa aýystyrady. Bapkerimen tanysqan kúnnen bastap, bul sport túrine erekshe mahabbaty ashylady. Kún saıyn erinbeı jattyǵyp, alǵash ret Túrkistanda ótken saıysta jarqyrap kórinedi. Boz bala shaǵynda Germanııada ótken týrnırde top jaryp, bapkerler olımpıadaǵa daıarlaý jattyǵýlaryna qabyldaıdy. 1999 jyly Tashkentte ótken búkil Azııa birinshiliginde kúmis júldege ıe bolyp, olımpıada oıyndaryna joldama alady. Solaı 2000 jyly Sıdneıde tartysty oıyndar ótkizip, altyn medalǵa ıe bolady. Fılmniń túsirilim jumystary Túrkistan, Almaty jáne Ystanbul qalalarynda ótken. Basty róldi jas akter Samat Ázimqulov somdady. Ol 2006-2007 jyldary kıkbokstan jastar arasynda eki ret Qazaqstan chempıony bolǵan.
Sonymen qatar týyndydan Ǵalymbek Ospanov, Murat Jarylqasynov, Maıra Maqulbekova, Dýlyǵa Aqmolda, Qýanysh Muqataı, Baqdaýlet Shaımahan jáne basqa akterlerdi kóresizder. Tolyq metrajdy kartına osy kúzde elimizdiń barlyq kınoteatrlarynda kórsetiledi dep josparlanyp otyr.
