BÁIGE: Dinı maqalalar baıqaýy jarııalandy

QMDB-nyń Semeı qalalyq «Qos munaraly» ortalyq meshiti Abaı Qunanbaıulynyń 175 jyldyq mereıtoıyna oraı 2020 jyldyń 20 qańtary men 1 mamyry aralyǵynda Abaı shyǵarmalaryn teologııalyq saraptamalyq taldaý baǵytyndaǵy maqalalarǵa respýblıkalyq baıqaý jarııalaıdy.

Baıqaýdyń maqsaty:

– Abaı hakimniń Islam álemindegi kórnekti oıshyldar qatarynda turǵanyn, ıláhı ilim boıynsha qaldyrǵan muralary barsha adamzatqa ortaq tulǵa ekenin kórsetý;

– Meshit qyzmetkerleri men dintanýshylardy din men dástúr sabaqtastyǵy aıasynda tyń izdenisterge shaqyryp, jańashyl baǵytta jumys júrgizýge yntalandyrý.

– Ulttyq qundylyqtardy dáripteý. Babalar dúnıetanymyna, ustanymyna saı, qazaqy sıpattaǵy ıslamı mektep baǵytyn qalyptastyrý, damytý.

– Din salasyndaǵy ózekti máseleler boıynsha materıaldar jazyp júrgen din qyzmetkerlerin qoldaý.

Baıqaý sharttary:

*Materıaldar kompıýterde, qarip túri «Times New Roman», 12 shrıftimen terilip, 1,5 ıntervalda, A4 formatymen 3-5 bet shamasynda bolýy tıis.

*QMDB boıynsha tirkelgen meshit-medrese qyzmetkerleri, ıslamtanýshylar men dintanýshylar ǵana qatysa alady. Baıqaý memlekettik tilde ótedi.

Qoıylatyn basty talap:

Taqyryp aıasy shekteýli. Usynylatyn materıaldarda Abaıdyń belgili bir dinı óleńi nemese bir qara sózi basty nysana retinde alynyp, sharıǵı turǵyda taldanýy tıis. Iaǵnı, Islam áleminiń kórnekti oıshyl-ǵulamalarynyń pikirlerimen salystyra otyryp túsindirilýi qajet. Osy arqyly Abaı rýhanııatynyń ishki máni keńinen kórsetilýi kerek. Bul rette álemdik deńgeıdegi ıslamı klassıkalyq kitaptar avtorlary (Mysaly, hazireti Iassaýı, ıbn Qudama, ımam Ǵazalı t.s.s.) tujyrymdarynan mátinder keltirip,  ushtastyrý mindetti.

Maqalada avtordyń jeke oı-pikiri emes, ǵulamalardyń rýhanı úndestigi kórsetilýi tıis.

Baıqaýǵa qatysýshylar Uıymdastyrý alqasynyń meshetsemey_makala@mail.ru  Elektrondy poshtasyna (baılanys tel.: + 7 707 906 79 80) qosymsha mynadaı materıaldar jiberýi tıis:

1) Avtor týraly maǵlumat /týǵan jeri, kúni, aıy, jyly, qyzmet orny;
2) Elektrondy adresi, baılanys telefony;

Avtor 1 nemese 2 materıal usyna alady;

Baıqaý kezeńderi:

1. Baıqaýǵa qatysýshylardan materıaldardy qabyldaý (20 qańtardan 1 mamyrǵa deıin);
2. Materıaldardy saraptaý jáne jeńimpazdardy anyqtaý (1 mamyr – 1 maýsym aralyǵy);
3. Baıqaý jeńimpazdaryn saltanatty marapattaý aldyn ala habarlanatyn bolady.

Jeńimpazdardy 5 nemese 7 adamnan turatyn qazylar alqasy, abaıtanýshylar, dintanýshy ǵalymdar saraptaı otyryp tańdaıdy.

Irikteý kezeńinde maqaladaǵy stılıstıkalyq saýattylyq, ıntellektýaldyq deńgeı, baıqaý talabynan aýytqymaý, Emotsııalyq áser eskeriledi.

Júlde qory:

Bas júldege úsh oryn beriledi. Jeńimpazdar uıymdastyrýshylar esebinen Semeı jerine kelip, «Abaı álemine saıahat» jobasy aıasynda bir apta boıy oblystyń (Bórli, Jıdebaı, Eńilik – Kebek…t.b.) tarıhı-mádenı nysandaryn aralap, Alakól jaǵalaýyndaǵy týrıstik orynda tynyǵýǵa joldama alady.

Qurmetti áriptester, shyǵarmashylyq baıqaýǵa aqparattyq qoldaý kórsetip, osy taqyrypqa qyzyǵýshylyq tanytatyn qalamgerlerge taratýlaryńyzdy suraımyz.