Batys Qazaqstan oblysyna jańa ókil ımam taǵaıyndaldy (FOTO)

Búgin Qasıetti jumada Bas múftı Serikbaı qajy Satybaldyuly hazirettiń buıryǵymen Muratbek Muhtarhanuly Qystaýbaev Qazaqstan musylmandary dinı basqarmasynyń Batys Qazaqstan oblysy boıynsha ókil ımamy jáne oblystyq ortalyq meshittiń bas ımamy bolyp taǵaıyndaldy.

Qazaqstan musylmandary dinı basqarmasynyń birinshi tóraǵa orynbasary, naıb múftı, QMDB-nyń Nur-Sultan qalasy boıynsha ókili, respýblıkalyq «Áziret Sultan» meshitiniń bas ımamy Naýryzbaı qajy Taǵanuly juma namazyn júrgizip, meshit ujymy men Aqjaıyq jamaǵatyna jańa ókil ımamdy tanystyrdy.

«Muratbek Muhtarhanuly áıgili «Ál-Azhar» ýnıversıtetin támamdaǵan, dinı bilimi joǵary. 2013 jyldan bastap Oral ortalyq meshitiniń naıb ımamy, Oral medresesiniń dırektorynyń orynbasary qyzmetin atqardy. Endigi kezekte ásem Aqjaıyqtyń rýhanı ómirine qaltyqsyz qyzmet etip, bar biliktiligi men bilimin, ynta-jigerin osy óńirdiń dinı turaqtylyǵyn nyǵaıtýǵa jumsaıdy dep senemin», - dedi Naýryzbaı qajy Taǵanuly.

Al, osyǵan deıin QMDB-nyń BQO boıynsha ókil ımamy qyzmetin atqarǵan Erkebulan qajy Qaraqulov QMDB-nyń Shymkent qalalyq ortalyq «Halifa al-Nahaian Aqmeshiti»  meshitine naıb ımamy,  Shymkent qalasy, Eńbekshi aýdandyq «Ál-Bilál» meshitiniń bas ımamy qyzmetine aýysty. Onyń atqarǵan qyzmetine qurmet kórsetilip, qazaqy saltpen ıyǵyna shapan japty.

Muratbek Muhtarhanuly Qystaýbaev – 1983 jyly dúnıege kelgen.

2000-2005 jyldary Q.A.Iassaýı atyndaǵy gýmanıtarlyq ınstıtýty «Dintaný» fakýltetin;  2005-2013 jyldary  Egıpet Arab Respýblıkasy Ál-Azhar halyqaralyq ıslam ýnıversıteti «Sharıǵat» fakýltetin támámdaǵan.

2013 jyldan bastap «Oral» oblystyq ortalyq meshitiniń naıb ımamy,

2015-2018 jyldary «Oral» medresesi dırektorynyń oqý-isi jónindegi orynbasary qyzmetin atqarǵan.

2019 jyldyń  5-shildesinen bastap QMDB-nyń Batys Qazaqstan oblysy boıynsha ókili, BQO ortalyq meshitiniń bas ımamy qyzmetine taǵaıyndaldy.

Úılengen, bir uly, bir qyzy bar.