Bas múftımen ashyq áńgime: dinı ahýal sóz boldy (FOTO)

Búgin Elordada Qazaqstan musylmandary dinı basqarmasynyń tóraǵasy Serikbaı qajy Oraz belgili qalamger, saıasattanýshy Kenjebolat Joldybaımen júzdesti.

Kezdesýde elimizdegi dinı ahýal, meshitterdiń tynys-tirshiligi, din qyzmetkerleriniń jumysy sóz boldy. Bas múftı Kenjebolat Mahmutulyna kelesi aıda ótetin III respýblıkalyq ımamdar forýmy jaıly áńgimelep berdi. Serikbaı qajy Satybaldyuly osy forýmda qabyldanatyn «Dinı rásimderdiń tizilimi» qujatyna aıryqsha toqtalyp, onyń mańyzyn sóz etti.

Kezdesýde múftııattyń aqparat keńistigindegi jumysyn jandandyrý jaıy da qozǵaldy. Kenjebolat Joldybaı bul baǵytta óz tarapynan qoldaý kórsetiletindigin jetkizdi. Suhbat barysynda ımam-moldalardyń ýaǵyzy men qoǵamdyq pikirdiń úılesimi talqylandy.

Basqosý sońynda qoǵam ıgiligi úshin izgi ister men jobalardy birlese júzege asyrý máseleleri pysyqtaldy.